‘ශ්‍රී ලංකා – ග්වැන්ෂෝ මිත්‍රත්ව පා පැදි සවාරිය (Sri Lanka – Guangzhou Friendship Cycle Tour) සඳහා සහභාගී වීමට චීන ජාතික පා පැදි ශූරයින් 47 දෙනෙකු මෙරටට පැමිණ තිබෙනවා.
මෙම පාපැදි ශූරයින් අද (16) පෙරවරු 11.05ට කටුනායක ගුවන් තොටුපොළ වෙත ග්වැන්ෂෝ නුවර සිට ශ්‍රී ලන්කන් ගුවන් සේවයේ යූ.එල්.- 885 දරන ගුවන් යානයෙන් පැමිණි බවයි වාර්තා වන්නේ.
ක්‍රීඩා අමාත්‍යාංශය, ශ්‍රී ලංකා සංචාරක ප්‍රවර්ධන කාර්යාංශය, ශ්‍රී ලංකාවේ චීන තානාපති කාර්යාලය සහ චීනයේ ග්වැන්ෂෝ ශ්‍රී ලංකා කොන්සල් ජනරාල් කාර්යාලය එක්ව මෙම පාපැදි සවාරිය සංවිධානය කරනු ලබනවා.
මෙම පා පැදි සවාරිය මෙරට වයස අවුරුදු 19 න් පහළ පා පැදි කණ්ඩායම නගා සිටුවීම ඉලක්ක කරගෙනයි සංවිධානය කෙරෙන්නේ.
ක්‍රීඩා අමාත්‍යාංශය විසින් තෝරා ගත් වයස අවුරුදු 19 න් පහළ ශ්‍රී ලාංකික පා පැදි ශූරයින් 11 දෙනෙකු සමග මෙම චීන ජාතික පා පැදි ශූරයින් හෙට (17) දින කොළඹ ක්‍රීඩා අමාත්‍යාංශය ඉදිරිපිටින් මෙම සවාරිය ආරම්භ කර ගාලු පාර ඔස්සේ ගමන් කරමින් ජුලි 20 වැනි දින යාල වනෝද්‍යානය තුළින් අවසන් කිරීමට නියමිතයි.
මෙම පා පැදි සවාරිය අවසානයේ මෙරට වයස අවුරුදු 19 න් පහළ තෝරා ගත් පා පැදි ශූරයින් හට හා චීන ජාතික පා පැදි ශූරයින් හට නවතම පා පැදි 11 ක් පරිත්‍යාග කිරීමට ද කටයුතු යොදා තිබෙනවා.
