එක්දින ලෝක කුසලාන තරගාවලියේ ශ්‍රී ලංකාව සහ ඉන්දියාව අතර තරගය අද (02) පැවැත්වෙනවා.
මුම්බායි හි වන්කඩේ ක්‍රීඩාංගණයේදී මෙම තරගය පැවැත්වෙන්නේ දිවා රාත්‍රි තරගයක් ලෙසයි.
අද තරගයට ධනංජය ද සිල්වා වෙනුවට දුනිත් වෙල්ලාලගේ කණ්ඩායමට එක්වන බවටයි තොරතුරු වාර්තා වුණේ.
ලෝක කුසලාන තරගය ඉතිහාසයේ ශ්‍රී ලංකාව සහ ඉන්දියාව අද මුණගැහෙන්නේ 10 වන වරට වන අතර, මීට පෙර මුණගැසුනු අවස්ථා නවයේදී ඉන්දියාව තරග පහක් සහ ශ්‍රී ලංකා තරග තුනක් ලෙස ජයගෙන තිබෙනවා.
ඉන් එක් තරගයක් අවසන්ව ඇත්තේ ජය පරාජයෙන් තොරවයි.
අද පැවැත්වෙන මෙම තරගය ඉන්දියාව ජයගතහොත් මෙවර ලෝක කුසලානයේ සුපිරි හතර දෙනා අතරට එකවන පළමු කණ්ඩායම බවට පත්වෙනවා.
මේ අතර අද පැවැත්වෙන තරගය එක්සත් ජාතීන්ගේ ලෝක ළමා අරමුදල වෙනුවෙන් වෙන්කර තිබීම ද විශේෂත්වයක්.
ශ්‍රී ලංකා කණ්ඩායම අද තරගයේදී කළු පටියක් පැළැද තරග බිමට පිවිසෙන අතර, ඒ මෙරට සිටි ජනප්‍රියම ක්‍රිකට් දිරිගන්වන්නා වන පර්සි අබේසේකරගේ අභාවයට ශෝකය පළකිරීම වෙනුවෙන්.
අද තරගය පැවැත්වෙන මුම්බායි හි වන්කඩේ ක්‍රීඩාංගණයේදී ඉන්දීය කණ්ඩායම එක්දින තරග විස්සක් ක්‍රීඩාකර ඉන් තරග 11ක් ජයගෙන තිබෙනවා.
ශ්‍රී ලංකාව එම ක්‍රීඩාංගණයේදී එක්දින තරගය පහකට මුහුණ දී ජයගෙන ඇත්තේ තරග තුනක් පමණයි.
මෙවර ලෝක කුසලානයේ ශ්‍රී ලංකාවේ ඉදිරි ගමන අවිනිශ්චිත තත්ත්වයක තිබෙන මොහොතක වුව ද අද දිනයේත් මිලියන ගණනක් වූ ශ්‍රී ලාංකික ප්‍රේක්ෂකයින් රූපවාහිනී තිරය ඉදිරිපිට හිදගන්නේ ශ්‍රී ලංකා කණ්ඩායමේ ජයග්‍රහණය අපේක්ෂාවෙන්.
