ශ්‍රී ලංකාවේ ලොකුම පීට්සා එක මීගමුවේ හදයි (ඡායාරූප)

ශ්‍රී ලංකාවේ විශාලතම පීට්සාව මීගමුව, ඒත්තුකාල ප්‍රදේශයේ හෝටලයක කාර්ය මණ්ඩලයක් විසින් එම හෝටල් පරිශ්‍රයේ දී නිර්මාණය කර තිබෙනවා.

ඒ, පෙබරවාරි මස 09, එනම් අද දිනට යෙදී ඇති ලෝක පීට්සා දිනය නිමිත්තෙන්.

මේ සදහා එම හෝටලයේ විධායක සූපවේදී දුමින්ද වනිගසේකර මහතා මූලිකත්වය ගෙන ක්‍රියා කර තිබුණා.

අඟල් 50ක් දිග මෙම පීට්සාව කිලෝ ග්‍රෑම් 12 ක බරකින් යුක්තයි.

පීට්සාව නිර්මාණය කිරීම සදහා තක්කාලි මිශ්‍රණයක්, මොසැරැල්ලා චීස්, කුකුළු මස්, සොසේජස්, විවිධ පාට සහ රස වර්ග 04 කින් යුතු බෙල් පෙපර්, ඔලිව් තෙල් සහ බී ළූණු භාවිතා කර තිබුණා.

ඒ අනුව, මෙම පීට්සාව විනාඩි 08 ක කාලයකින් පුළුස්සා නිම කර ගැනීමට හැකි වී තිබූ බවයි වාර්තා වුණේ.

පීට්සාව රස බැලීම සදහා 100 කට අධික පිරිසක් මෙම හෝටල් පරිශ්‍රයට පැමිණ සිටි බව සඳහන්.

එකවර 08 දෙනෙකුට භුක්ති විඳීමට හැකි වන ලෙස අඟල් 25 ක් දිග වන ආකාරයට සකස් කර පීට්සා කැබලි ඔවුන්ට ආහාර සදහා පිරිනැමීම සිදු කෙරුණා.

පසුගිය 2021 වසරේ දීද මෙම හෝටලය අඟල් 40 ක් දිග පීට්සාවක්, ලෝක පීට්සා දිනය නිමිත්තෙන් සකස් කර තිබුණා.