ප්රංශ ජනාධිපතිවරයෙක් මෙරට සංචාරයක නිරත වූ පළමු අවස්ථාව සනිටුහන් කරමින් ප්රංශ ජනාධිපති එමානුවෙල් මැක්රොන් සිය දකුණු පැසිෆික් කලාපයේ සංචාරයෙන් අනතුරුව ඊයේ (28) ශ්රී ලංකාවේ ඓතිහාසික සංචාරයක නිරත වුණා.
මෙහිදී ජනාධිපති රනිල් වික්රමසිංහ විසින් ප්රංශ ජනාධිපතිවරයාව ඉතා සුහදශීලිව පිළිගත් අතර, පැයකුත් විනාඩි පහළොවකට ආසන්න කාලක් නායක දෙපළ සුහද සහ සාර්ථක ද්විපාර්ශ්වික සාකච්ඡවක ද නිරත වූ බවයි ජනාධිපති මාධ්ය අංශය සඳහන් කළේ.
ප්රංශය සහ ශ්රී ලංකාව අතර රාජ්ය තාන්ත්රික සබඳතාවල 75 වන සංවත්සරය සමරන මෙම අවස්ථාවේ දෙරට අතර ද්විපාර්ශ්වික සබඳතා තවදුරටත් ශක්තිමත් කර ගැනීම පිළිබඳ මෙහිදී විශේෂ අවධානය යොමු කර තිබෙනවා.
ජාත්යන්තර සබඳතාවන්හි දී ප්රංශයේ මැදිහත්වීම අගය කළ ජනාධිපති රනිල් වික්රමසිංහ, විශේෂයෙන් දේශගුණික විපර්යාස අවම කිරීම, විදේශ ණය ප්රශස්තකරණය සහ ඉන්දු-පැසිෆික් කලාපයේ ගැටලු පිළිබඳ දක්වන සහයෝගය ද අගය කර සිටියා.
මෑතකදී ප්රංශයේ පැවැත් වූ නව ගෝලීය මූල්ය සම්මුතියක් සඳහා වූ සමුළුව අතරතුරදී ජනාධිපති රනිල් වික්රමසිංහ සමඟ පැවැත්වූ සාකච්ඡාව පිළිබඳව ද ජනාධිපති මැක්රොන් මෙහිදී සිහිපත් කළා.
ශ්රී ලංකාවේ ආර්ථික ප්රකෘතිය සඳහා සහය දැක්වීමට ප්රංශයේ කැපවීම එමානුවෙල් මැක්රොන් මෙහිදී යළිත් තහවුරු කළ අතර, ශ්රී ලංකාවේ සිව්වන විශාලතම ණයහිමියා ලෙස ප්රංශය, ණය ප්රතිව්යුහගත කිරීමේ ක්රියාවලියට සිය සහය ලබාදෙන බවට ද ප්රතිඥා ලබා දුන්නා.
දේශපාලන, ආර්ථික, සංචාරක, දේශගුණික විපර්යාස, තිරසාර සංවර්ධනය සහ සමුද්රීය ක්රියාකාරකම් ඇතුළු විවිධ ක්ෂේත්රවල දෙරට අතර සහයෝගීතාව ශක්තිමත් කර ගැනීම පිළිබඳව නායකයින් දෙපළ මෙහි දී දීරඝ ලෙස සාකච්ඡා කළා.
ප්රංශය සහ ශ්රී ලංකාව අතර රාජ්ය තාන්ත්රික සබඳතාවල 75 වනි සංවත්සරය නිමිති කොට ගෙන, දෙරට අතර සහයෝගීතාව තවදුරටත් වර්ධනය කර ගැනීම සඳහා නිශ්චිත ක්ෂේත්ර කිහිපයක් ද මෙහිදී හඳුනා ගනු ලැබුවා.
සමුද්රීය ආරක්ෂාව සහ සුරක්ෂිතතාව සඳහා අධ්යාපන ආයතනයක් පිහිටුවීම, සංවර්ධනය සඳහා වූ ප්රංශ නියෝජිතායතනයක් (AFD) ශ්රී ලංකාව තුළ ස්ථාපිත කිරීම, ඉහළ මට්ටමේ රාජ්යතාන්ත්රික සංවාද ආරම්භ කිරීම, අධ්යාපන ක්ෂේත්රයේ සහයෝගීතාව සහ සාගරය ආශ්රිත මිනිස් ජාවාරමට මැඩ පැවැත්වීමේ උත්සාහයන් වැඩිදියුණු කිරීම යනාදිය මෙම සහයෝගීතා ක්ෂේත්රවලට ඇතුළත්.
මීට අමතරව, වත්මන් ගෝලීය සන්දර්භය තුළ කලාපීය සහ බහුපාර්ශ්වික උනන්දුවක් දක්වන මාතෘකා පිළිබඳව ද නායකයින් දෙදෙනා සිය අදහස් හුවමාරු කර ගත්තා.
ප්රංශය සාමාජිකත්වය දරණ ඉන්දීය සාගර කලාපීය සංගමයේ (IORA) ඉදිරි සභාපතිත්වය අතරතුර ශ්රී ලංකාව සමඟ සහයෝගයෙන් කටයුතු කිරීමට ප්රංශය දැඩි උනන්දුවෙන් පසුවන බවද ප්රංශ ජනාධිපතිවරයා පවසා සිටියා.
ප්රංශය ක්රියාකාරීව සහභාගී වන ඉන්දීය සාගර කොමිසම කෙරෙහි ජනාධිපති රනිල් වික්රමසිංහගේ කැපවීම ද මෙහිදී ප්රකාශ කෙරුණා.
2023 ජුනි 22 සිට 23 දක්වා ජනාධිපති මැක්රොන් විසින් පැරිස් නුවරදී සංවිධානය කළ නව ගෝලීය මූල්ය ගිවිසුමක් සඳහා වන සමුළුව ඉතා කාලෝචිත බව ඊට සහභාගී වූවෙකු වශයෙන් අගය කරන බව ජනාධිපති රනිල් වික්රමසිංහ මෙහිදී පැවසුවා.
තිරසාර අනාගතයක් සඳහා වන ගෝලීය ප්රයත්නයන් සඳහා ශ්රී ලංකාවේ කැපවීම අවධාරණය කරමින් පැරිස් න්යාය පත්රයට සම්බන්ධ වීමට ශ්රී ලංකාවේ එකඟතාව ද මෙහිදී ප්රකාශ කළා.
මෙම සාකච්ඡාවලින් අනතුරුව ප්රංශ ජනාධිපති එමානුවෙල් මැක්රොන් ට්විටර් පණිවුඩයක් නිකුත් කරමින්, “ශ්රී ලංකාව සහ ප්රංශය ඉන්දියන් සාගරයේ එකම අරමුණක් වන විවෘත, විස්තීර්ණ සහ සමෘද්ධිමත් ඉන්දු- පැසිෆික් කලාපයක් බෙදාගන්නා රටවල් දෙකකි: කොළඹදී අපි එය තහවුරු කළා: අපගේ 75 වසරක රාජ්ය තාන්ත්රික සබඳතා ශක්තිමත්ව, අපගේ හවුල්කාරිත්වයට නව යුගයක් විවෘත කරන්නෙමු ” යනුවෙන් සඳහන් කර තිබුණා.
යුරෝපීය සහ විදේශ කටයුතු පිළිබඳ අමාත්ය කැතරින් කොලොන්නා, විදේශ කළාප පිළිබඳ රාජ්ය අමාත්ය ෆිලිප් විජියර්, ශ්රී ලංකාවේ සහ මාලදිවයිනේ ප්රංශ තානාපති ජොං- ෆ්රන්ස්වා පක්ටෙට් (Jean-Francoise Pactet), ප්රංශ ජනාධිපතිවරයාගේ උපදේශකවරුන් වන ෆේබියන් මැන්ඩන්, වලිඩ් ෆුක් සහ ජොසු සෙරෙස්, ප්රංශ විදේශ කටයුතු අමාත්යාංශයේ ආසියානු දෙපාර්තමේන්තුවේ ප්රධානී බෙනොයිට් ගයිඩි, ප්රංශ ජනාධිපතිවරයාගේ මාධ්ය කොන්සියුලර් ජෝනාස් බයාර්ඩ්, විදේශ කටයුතු පිළිබඳ අමාත්යවරයාගේ උපදේශක ෆ්ලොරියන් කාර්ඩිනොක්ස් යන අය ප්රංශ දූත පිරිසට ඇතුළත් වුණා.
විදේශ කටයුතු අමාත්ය අලි සබ්රි, ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක සහ ජනාධිපති කාර්ය මණ්ඩල ප්රධානි සාගල රත්නායක, ජනාධිපති ලේකම් සමන් ඒකනායක, විදේශ කටයුතු අමාත්යාංශ ලේකම් අරුණි විජේවර්ධන, මහ බැංකු අධිපති ආචාර්ය නන්දලාල් වීරසිංහ, ආර්ථික කටයුතු පිළිබඳ ජනාධිපති උපදේශක ආචාර්ය ආර්.එච්.එස්. සමරතුංග, ශ්රී ලංකා විදේශ කටයුතු අමාත්යාංශයේ අධ්යක්ෂ ජනරාල් (යුරෝපය සහ උතුරු ඇමරිකාව) ශෝබිනි ගුණසේකර, ජනාධිපතිවරයාගේ තරුණ කටයුතු සහ තිරසර සංවර්ධන අධ්යක්ෂ රන්දුල අබේවීර යන අය ද මෙම අවස්ථාවට එක්ව සිටියා.
