සංචාරක ශ්‍රී ලංකා කණ්ඩායම සහ බංග්ලාදේශය අතර පළමු ටෙස්ට් තරගය අද (22) සිල්හෙට් හිදී ආරම්භ වනවා.
තරග දෙකකින් සමන්විත මෙම තරගාවලිය අයි.සී.සි ලෝක ටෙස්ට් ශූරතාවයට අදාළ පැවැත්වෙන අතර, ශ්‍රී ලංකාවට තීරණාත්මක තරගාවලියක් වනවා.
ඒ, මෙවර ලෝක ටෙස්ට් ශූරතාවලියේ තවමත් කිසිඳු ප්‍රසාද ලකුණක් ලබා නොගත් එකම කණ්ඩායම බවට පත්ව සිටීම හේතුවෙන්.
එමෙන්ම ධනංජය ද සිල්වාගේ ශ්‍රී ලංකා ටෙස්ට් කණ්ඩායමේ නව නායකත්වය යටතේ දිවයිනෙන් පිටත ක්‍රීඩාකරන පළමු තරගාවලිය ද මෙයවීම විශේෂත්වයක්.
මේ අතර මෙම තරගාවලිය සඳහා කණ්ඩායම දෙකම අද එක්වන්නේ ටෙස්ට් ආකෘතියේ සඳහා විශේෂඥ ක්‍රීඩකයින් දෙදෙනෙක් නොමැතිවයි.
ඒ, අනුව බංග්ලාදේශයේ මුෂ්ෆිකර් රහීම් නොමැතිව මෙම තරගාවලියට එක්වන අතර, ශ්‍රී ලංකාව ටෙස්ට් කණ්ඩායමේ ප්‍රධානතම වේග පන්දු යවන්නා වන අසිත ප්‍රනාන්දු නොමැතිව මෙම තරගාවලියට එක්වනවා.
අද තරගය මෙරට වේලාවෙන් පෙරවරු 9.30ට ආරම්භ වීමට නියමිතයි.
