ජනාධිපති අනුර කුමාර දිසානායක මහතා සහ ශ්රී ලංකන් ගුවන් සමාගමේ ඉහළ නිලධාරීන් අතර හමුවක් ජනාධිපති ලේකම් කාර්යාලයේ දී අද (08) පස්වරුවේ පැවැත්වුණා.
ශ්රී ලංකන් ගුවන් සමාගම වඩා ලාභදායී රාජ්ය ව්යාපාරයක් බවට පත් කිරීමට අදාළ යෝජනා පිළිබඳ ව මෙහිදී පුළුල් ලෙස සාකච්ඡා කෙරුණු අතර ශ්රී ලංකන් ගුවන් සමාගමේ ණය කළමනාකරණය සඳහා ගත හැකි කෙටි කාලීන සහ දිගු කාලීන විසඳුම් පිළිබඳව ද අවධානය යොමු වූ බවයි ජනාධිපති මාධ්ය අංශය නිවේදනය කළේ.
නව ආයෝජන අවස්ථා පිළිබඳව ද මෙහිදී සාකච්ඡා කෙරුණා.
ශ්රී ලංකන් ගුවන් සේවය ලාභදායී ආයතනයක් බවට පත් කිරීමට ගත හැකි සෑම පියවරක්ම ගන්නා ලෙස ජනාධිපතිවරයා නිලධාරීන්ට උපදෙස් ලබා දුන්නා.
ශ්රී ලංකන් ගුවන් සේවයේ මෙහෙයුම් ලාබ ලැබුව ද, වැරදි කළමනාකරණ තීරණ හේතුවෙන් පාඩු ලබන රාජ්ය ව්යවසායන් අතර ඉහළින්ම ඇති ආයතනයක්.
එම ආයතනය පෞද්ගලීකරණය කිරීමට පසුගිය ආණ්ඩුව විසින් ගන්නා ලද තීන්දුව වෙනස් කරමින් වත්මන් රජය එය තවදුරටත් ජාතික ගුවන් සේවය ලෙස පවත්වාගෙන යාමටත්, නව කළමනාකරණයක් යටතේ ලාභ ලබන ආයතනයක් බවට පරිවර්තනය කර ඉදිරියට පවත්වාගෙන යාමටත් තීරණය කර තිබෙනවා.
කම්කරු අමාත්ය හා ආර්ථික සංවර්ධන නියෝජ්ය අමාත්ය ආචාර්ය අනිල් ජයන්ත ප්රනාන්දු, ජනාධිපති ජ්යෙෂ්ඨ උපදේශක දුමින්ද හුලංගමුව යන මහත්වරු ද, ශ්රී ලංකන් ගුවන් සමාගමේ සභාපති සරත් ගනේගොඩ මහතා ඇතුළු ශ්රී ලංකන් ගුවන් සමාගමේ උසස් නිලධාරීහු පිරිසක්ද මෙම අවස්ථාවට එක්ව සිටියා.
wpDiscuz
