ශ්රී පාද උඩමළුව ආසන්නයේ රත්නපුර මාර්ගයේ ආරක්ෂක වැටකින් පහළට පැන පසුගිය 19 වනදා අතුරුදන් වූ තරුණයා ඊයේ (24) පස්වරුවේ සොයාගත්තා.
ඒ, නල්ලතන්නිය පොලිස් වසමට අයත් රාජමලේ තේ වතුයායේ දීයි.
එලෙස සොයාගත් තරුණයා මස්කෙළිය රෝහලට ඇතුළත් කෙරුණු අතර, ඔහු වැඩිදුර ප්රථිකාර සඳහා ග්ලැන්කන් දිස්ත්රික් මූලික රෝහල වෙත මාරුකර යවා ඇති බවයි අද (25) උදෑසනවන විට දැනගන්නට ලැබුණේ.
හම්බන්තොට සූරියවැව ප්රදේශයේ පදිංචිව සිටි දිනේෂ් හේමන්ත නැමැති 33 හැවිරිදි මෙම තරුණයා තවත් කාන්වතාවන් දෙදෙනෙක් ද සමඟ නල්ලතන්නිය-ශ්රීපාද මාර්ගයෙන් ශ්රී පාදය වැඳපුදා ගැනීමට ගොස් ඇති බවයි වාර්තා වුණේ.
එලෙස ශ්රී පාද උඩමළුවට ගොස් ඇති මෙම තරුණයා පසුගිය 19 වනදා එහි ආරක්ෂක වැටකින් පහළට පැන අතුරුදන්ව ඇති බව පවසමින් ඔහු සමඟ පැමිණි කාන්තාවන් රත්නපුර මාර්ගයේ සිරිපාගම පොලිසියට පැමිණිලි කර තිබුණා.
මේ අතර අදාළ තරුණයා ආරක්ෂකවටෙන් පහළට පනින ආකාරය ද අසළ සවිකර තිබූ ආරක්ෂිත කැමරාවල ද සටහන්ව තිබුණා.
පසුව ඔහු සොයා ආරක්ෂක අංශ සෝදිසි මෙහෙයුම් ආරම්භ කළ අතර, පසුව දින තුනක් ක්රියාත්මක කළ එම මෙහෙයුම් නවතා දමන්නට පසුගිය දා කටයුතු කළා.
එවැනි තත්ත්වයක දී අතුරුදන් වූ අදාළ තරුණයා මරේ තේවතුයායට අයත්, රාජමාලයේ කොටසේ රැඳී සිටිය දී වතුකම්කරුවන් පිරිසක් විසින් දැක ඒ පිළිබඳව නල්ලතන්නිය පොලිසියට දැනුම් දී තිබෙනවා.
පසුව නල්ලතන්නිය පොලිසියේනිලධාරී කණ්ඩායමක් වහා රාජමලේ තේවත්තට ගොස් මෙම තරුණයාව රෝහල් ගත කිරීමටයි කටයුතු කර තිබුණේ.