තුන් ඉරියව් ක්‍රීඩක ශකීබ් අල් හසන් ආසියානු කුසලානය සහ ලෝක කුසලානය වෙනුවෙන් බංග්ලාදේශ එක්දින කණ්ඩායමේ නායකත්වයට යළිත් පත්කර තිබෙනවා.
මෙම පත් කිරීම සිදුකර ඇත්තේ මීට පෙර බංග්ලාදේශ එක්දින කණ්ඩායමේ නායකත්ව දැරූ තමිම් ඉක්බාල් එම තනතුරෙන් ඉවත්වීමට ගත් තීරණයෙන් පසුවයි.
බංග්ලාදේශ ක්‍රිකට් පාලක මණ්ඩලයේ සභාපති නස්මුල් හසන්, ඩකා හි පිහිටි සිය නිවෙසේ දී මාධ්‍ය හමුවක් පවත්වමින් ඊයේ (11) මේ බව නිවේදනය කළා.
ඒ, අනුව ශකීබ්ට ටෙස්ට්, එක්දින සහ විස්සයි විස්ස යන ආකෘති තුන තුළම බංග්ලාදේශයට නායකත්වය ලබාදීමට අවස්ථාව හිමිවනවා.
ෂකීබ් 2009 – 2011 අතර කාලය තුළ පළමු වරට බංග්ලාදේශ කණ්ඩායමේ නායකත්වයට පත් වූ අතර, එහිදී එක්දින තරඟ 49 කදී බංග්ලාදේශය මෙහෙයවමින් ඉන් 22 ක් ජයග්‍රහණය කර තිබෙනවා.
පසුව ඔහු 2015 සහ 2017 දී තවත් එක්දින තරඟ තුනක දී බංග්ලාදේශයට නායකත්වය ලබා දෙනු ලැබුවා.
ශකීබ් අල් හසන් මේ වනවිට එල්.පී.එල්. තරගවලියේ දී ගෝල් ටයිටන්ස් කණ්ඩායම නියෝජනය කරනවා.
