පාරම්පරික පොල් තෙල් නිෂ්පාදකයින් යැයි කියා ගන්නා පිරිසක් සූක්ෂම ලෙස පොල් තෙල් මිල වැඩි කිරීමේ උත්සාහයක නිරත වන බව පාරිභෝගික අයිතීන් සුරැකීමේ ජාතික ව්‍යාපාරයේ සභාපති රංජිත් විතානගේ පවසනවා.
දැනට වෙළඳපොළේ පොල් තෙල් හිඟයක් ඇති කිරීම ඔවුන්ගේ පළමු ක්‍රියාදාමය වී ඇති බව පැවසූ සභාපතිවරයා පසුගිය වසරේ ද ඔවුන් පොල් තෙල් මිල ඉහළ දැමීමක් සිදුකරණු ලැබූ බවයි සඳහන් කර සිටියේ.
පොල් තෙල් නිෂ්පාදනය කිරීම මෙම පිරිස් නිසි අමුද්‍රව්‍ය යොදා නොගන්නා බවත්, එමෙන්ම මිලෙන් අඩු ෆාම් තෙල් පොල් තෙල් හා කවලම්කර අලෙවිකරණ බවත් පාරිභෝගික අයිතීන් සුරැකීමේ ජාතික ව්‍යාපාරයේ සභාපතිවරයා වැඩිදුරටත් පවසා සිටියා.
“මේ වන විට පොල් ගෙඩියක මිල රුපියල් 120 – 130 දක්වා ඉහළ ගොස් තිබෙනවා. පොල් මිල ඉහළ යාමට විවිධ හේතූන් බලපෑම් සිදුකරනවා.පොල් මිල ඉහළ ගියත් පොල් තෙල් වෙළඳපෝළේ අලෙවි වන්නේ සාධාරණ මිලකට, එය එසේ සිදුවන්නේ පොත් තෙල් සැපයීමේ කිසියම් සාධාරණයක් හා කාර්යක්ෂමතාවයක් තිබෙන නිසා. නමුත් පාරම්පරික පොල් තෙල් නිෂ්පාදකයින් යැයි කියා ගන්නා එක්තරා පිරිසක් පොල් තෙල් මිල ඉහළ දැමීමට පාර කපමින් සිටින බවට අපට දැනගන්නට ලැබී තිබෙනවා. දැනට වෙළඳපොළේ පොල් තෙල් හිඟයක් ඇති කිරීම ඔවුන්ගේ පළමු වැනි ක්‍රියාදාමය වනවා. මේ ආකාරයට ඔවුන් පසුගිය වසරේ ද පොල් තෙල් මිල ඉහළ දැමීමක් සිදුකරණු ලැබුවා. පොල් තෙල් නිෂ්පාදනය කිරීම සදහා නිසි අමුද්‍රව්‍ය මෙම පිරිස විසින් යොදාගන්නේ නෑ. ඒ වගේම මේ අය කරන්නේ මිලෙන් අඩු ෆාම් තෙල් පොල් තෙල් හා කළවම්කර අලෙවි කිරීමයි. එය මිනිස් සිරුරට ඉතාමත්ම අහිතකරයි. එයින් ඔවුන් අධික ලාභයක්ද උපයා ගන්නවා. පාරම්පරික පොල් තෙල් නිෂ්පාදකයින් යැයි කියා ගන්නා මෙම කණ්ඩායමේ අරමුණ සාර්ථක වුවහොත් සිදුවන්නේ පොල් තෙල් මිල ඉහළ යාම පමණක් නොව විෂ ෆාම් තෙල් කලවම් කරන ලද පොල් තෙල් වෙළඳපොළට අලෙවිය සදහා නිකුත් කිරීමයි.”
