ලබන 15 වැනිදාට පෙර තම ඉල්ලීම්වලට විසඳුම් ලබාදීමට රජය අපොහොසත් වුවහොත් දැවැන්ත වෘත්තීය ක්‍රියාමාර්ගයක නිරත වන බවට වෘත්තීය සමිති අනතුරු අඟවා තිබෙනවා.
රජයේ බදු ප්‍රතිපත්තියට එරෙහිව ක්‍රියාත්මක කර ඇති අඛණ්ඩ වෘත්තීය ක්‍රියාමාර්ගය තීව්‍ර කරන බවටයි උසස් අධ්‍යාපන, වෛද්‍ය, බැංකු, වරාය සහ අනෙකුත් ක්ෂේත්‍රවල ඉහළ ආදායම් ලබන රාජ්‍ය සේවකයින් අනතුරු අඟවා ඇත්තේ.
විශ්වවිද්‍යාල ආචාර්යවරුන්ගේ සංගමයේ (FUTA) මාධ්‍ය ප්‍රකාශක චාරුදත්ත ඉලංගසිංහ ඊයේ කියා සිටියේ රජය මාර්තු 15 වනදා වන විට තීරණයක් ගත යුතු වන අතර එසේ නොමැතිනම් ජලය හෝ විදුලිය ලබා නොදෙන අතර විශ්වවිද්‍යාලවල අධ්‍යයන කටයුතු වෙනුවෙන් ද එක් නොවන බවයි.
සාධාරණ බදු ක්‍රමයක් හඳුන්වා දෙන ලෙස රජයෙන් ඉල්ලා සිටින ඔහු කියා සිටියේ වෘත්තීය සමිති තවමත් සාකච්ඡාවට විවෘත බවයි.
පසුගියදා මෙරට පැවැති වෘත්තීය සමිති විරෝධතා පිළිබඳව අදහස් දැක්වූ ඉලංගසිංහ මහතා, “මේක තමයි අපි ක්‍රියාවිරහිත කළ පළමු ස්විචය. අපි සෑම දිනකම නව ස්විචයක් ක්‍රියා විරහිත කරන අතර 15 වන දින ප්‍රධාන ස්විචය ක්‍රියා විරහිත කිරීමට කාලය පැමිනෙණු ඇති.”
මේ අතර, ලංකා බැංකු සේවක සංගමයේ සභාපති චන්න දිසානායක මහතා පැවසුවේ, තම සංගමය සහ ශ්‍රී ලංකා මහ බැංකුවේ (CBSL) සංගම් හතරක් මෙම ප්‍රචාරණ ව්‍යාපාරයට සහභාගී වන බවයි.
මේ අතර ලබන සඳුදා (13) වනදා සිට අදියර කිහිපයක් යටතේ වැඩ වර්ජන ක්‍රියාමාර්ගයක නිරත වීමට රජයේ වෛද්‍ය නිලධාරීන්ගේ සංගමය තීරණය කර තිබෙනවා.
ඒ අනුව, පළමු අදියර යටතේ ලබන සඳුදා පළාත් 4ක වැඩ වර්ජනයේ නිරත වීමටයි තීරණය කර ඇත්තේ.
සඳුදා වෛද්‍යවරුන් වැඩ වර්ජනයේ නිරත වන පළාත් වන්නේ බස්නාහිර, මධ්‍යම, නැගෙනහිර හා දකුණයි.
අද පැවති හදිසි මධ්‍යම කාරක සභා රැස්වීමේදී මෙම තීරණය ගත් බවත් ඉහළ නැංවූ බදු වලට එරෙහිව මෙම පියවර ගන්නා බවත් රජයේ වෛද්‍ය නිලධාරීන්ගේ සංගමයේ මධ්‍යම කමිටු සාමාජික වෛද්‍ය රුවන් ජයසූරිය සඳහන් කළා.
