පිළියන්දල දැල්තර ප්‍රදේශයේ විහාරස්ථානයක බෝ ගසක අත්තක් විහාරස්ථානයේ ආවාස ගෙට හා යාබදව පිහිටා තිබෙන නිවාස දෙකක් මතට හිටි හැටියේ කඩා වැටීමෙන් බරපතල අලාභ සිදු වී ඇතැයි කැස්බෑව ප්‍රාදේශීය ලේකම්වරයා පවසනවා.
එක් නිවසක මුලුතැන්ගෙය හැරෙන්නට අනෙකුත් සියලුම කොටස් සම්පූර්ණයෙන්ම විනාශ වී තිබෙනව බවත් රාත්‍රී 11ට පමණ මෙම අත්ත කඩා වැටෙන අවස්ථාවේ දී එම නිවසේ කුඩා දරුවන් තිදෙනකු ඇතුළු හත් දෙනෙකු නිදා සිට ඇති අතර කිසිවෙකුටත් තුවාල සිදු වී නැති බවයි වාර්තාවන්නේ.
මේ වන විට එම නිවසේ පදිංචි කරුවන්ට උන්හිටි තැන් අහිමිව ඥාති නිවසක රැකවරණය ලැබී තිබෙනවා.
බෝ ගසෙහි අත්ත කඩා වැටීමෙන් එම නිවසේ සියලුම බඩුබාහිරාදිය ද විනාශ වී ඇති අතර යාබද නිවසෙහි වහලයට මෙන්ම ආවාස ගෙයි වහලයටද තාප්පයකට ද අලාභ සිදු වී තිබෙන බවයි අප වාර්තාකරු පැවසුවේ.
සම්පූර්ණයෙන්ම විනාශ වූ නිවසේ පදිංචිකාරියක් මෙසේ පැවසුවා,
ඒ වන විට රාත්‍රී 11ට පමණ ඇති, මමයි පොඩි දුවයි ලොකු දුවයි එයාගේ මහත්තයයි දරු තුන්දෙනයි නිදාගෙන හිටියේ, එකපාරටම වහලය පැත්තෙන් විශාල සද්දයක් ආවා මුළු ගේම කඩා වැටුණා ,දෙයියො බැලුව වගේ අපි කාටවත් කිසිම තුවාලයක් වෙලා නෑ ,අපේ මුළු සේසතම විනාශ වෙලා අපි අසරණ වෙලා.
බෝ ගසෙහි අත්ත කඩා වැටීමෙන් නිවාස වලට සිදුවූ අලාභ සහ අනෙකුත් අලාභ සම්බන්ධයෙන් ආපදාකළමනාකරණ ඒකකය වෙත අදාළ ලිපි ලේඛන ඉදිරිපත් කර තිබෙනවා .
ඉදිරි දින කිහිපය තුළදී මූලික ගෙවීම් සිදුකර එම පවුල් වෙත සහන සලසන බව ප්‍රාදේශීය ලේකම්වරයා පවසා තිබෙනවා.
