විෂ මත්ද්රව්ය හා අන්තරායකාර ඖෂධ භාවිතය වැළැක්වීම සඳහා වන ජනාධිපති කාර්ය සාධක බළකායක් ස්ථාපිත කිරීමට රජය සැලසුම් කර තිබෙනවා.
අධිකරණ බන්ධනාගාර කටයුතු හා ආණ්ඩුක්රම ව්යවස්ථා ප්රතිසංස්කරණ අමාත්ය ආචාර්ය විජේදාස රාජපක්ෂගේ සහ ජනාධිපති ලේකම් සමන් ඒකනායකගේ ප්රධානත්වයෙන් ඊයේ (19) ජනාධිපති කාර්යාලයේදී පැවැති සාකච්ඡාවකදී යි මෙම කරුණු අනාවරණය කෙරුණේ.
මත්ද්රව්ය නිවාරණයට සම්බන්ධ සියලුම ආයතන ඒකාබද්ධ කර ගනිමින් විෂ මත්ද්රව්ය හා අන්තරායකාර ඖෂධ භාවිතය වැළැක්වීම සඳහා විශේෂ වැඩසටහනක් මෙම කාර්ය සාධක බලකාය යටතේ ක්රියාත්මක කිරිමට නියමිත අතර එම කටයුතු පිළිබඳව මෙහිදී දීර්ඝ ලෙස සාකච්ඡාවට ලක්ව තිබෙනවා.
පාසල් දරුවන් අතර මත්ද්රව්ය ව්යාප්ත වීමේ ගැටළුව සම්බන්ධයෙන් මෙහිදී විශේෂ අවධානය යොමු වු අතර එය වැළැක්වීම සඳහා ගතයුතු කඩිනම් ක්රියාමාර්ග පිළිබඳව සාකච්ඡාවට ලක්ය වුණා.
මත්ද්රව්ය නිවාරණය, මත්ද්රව්යවලට ඇබ්බැහි වූවන් සහ මත්ද්රව්ය අලෙවි කරන්නන් වෙන් කර හඳුනා ගැනීම, මත්ද්රව්යවලට ඇබ්බැහි වූවන් සඳහා ප්රතිකාර සහ උපදේශන සේවා ලබාදීම පිළිබඳව ද සාකච්ඡාවට ලක්වී තිබෙනවා.
මත්ද්රව්යවලට ඇබ්බැහිවී දැනට සිරගතව සිටින රැඳවියන් සහ ඔවුන් පිළිබඳ ගත යුතු ඉදිරි ක්රියාමාර්ග හා බන්ධනාගාර තුළ ඔවුන් වෙනුවෙන් සිදු කළ යුතු ප්රතිකාර විධිමත්ව ලබාදීම යන කරුණු කෙරෙහි ද අවධානය යොමු කෙරුණා.
මත්ද්රව්යවලට ඇබ්බැහිවූවන් ඉන් මුදා ගැනීම වෙනුවෙන් පවත්වාගෙන යන ස්වේච්ඡා මධ්යස්ථාන, ප්රජා මූලික පුනරුත්ථාපනය, පරිවාස සේවා සවිබල ගැන්වීම පිළිබඳව මෙන්ම මත්ද්රව්යවලට ඇබ්බැහි වූවන් පුනරුත්ථාපනය කිරීම පිළිබඳ පනත සම්මත කර ගැනීම පිළිබඳව ද මෙහිදී වැඩිදුරටත් සාකච්ඡා වුණා.
