මහනුවර ඓතිහාසික නිත්තවෙල පත්තිනි දේවාලය වැඳ පුදා ගැනීමට අද (25) පෙරවරුවේ පැමිණි පුද්ගලයන් දෙදෙනෙකු දේවාලයෙහි විෂ්ණු දේව ප්‍රතිමාවට පූජා කර, පළඳවා තිබූ මුදල් නෝට්ටු මාලයක් සොරාගෙන ගොස් ඇතැයි එහි භාරකාර මණ්ඩලය පවසනවා.
දසත ප්‍රාදේශීය වාර්තාකරු පැවසුවේ දේවාලයෙහි ප්‍රධාන පූසාරීවරයා සිය දේවාලයේ විෂ්ණු දේව ප්‍රතිමාවේ පලඳවා තිබූ අදාළ මුදල් නෝට්ටු මාලය නොමැති බව දැක ඒ පිළිබඳ ව දේවාලයෙහි භාරකාර මණ්ඩලයට දැනුවත් කිරීමට පියවර ගෙන ඇති බවයි.
පසුව එම දේවාලයේ භාරකාර මණ්ඩල සාමාජිකයින් CCTV දර්ශන පරීක්ෂා කිරීමේ දී අද උදෑසන එම මුදල් නෝට්ටු සහිත මාලය කිසියම් දෙදෙනකු විසින් සොරාගන්නා ආකාරය නිරීක්ෂණය වී තිබෙනවා.
සොරකම සිදුකළ පුද්ගලයන් දෙදෙනා දේවාලයෙහි ප්‍රධාන පූසාරීවරයාගෙන් තමන් දෙදෙනාට අත්‍යවශ්‍ය කරුණකට මහනුවරට යාමට අවශ්‍ය බවත් ඒ සඳහා මුදල් නොමැති බවත් පවසා ඔහුගෙන් තවත් රුපියල් දෙසීයක් ද ඉල්ලා ගෙන ගොස් ඇති බවත් හෙළි ව ඇති බවයි පැවසෙන්නෙ.
දේවාලයෙහි භාරකාර මණ්ඩලය ඒ සම්බන්ධයෙන් කටුගස්තොට පොලීසිය ද දැනුම්වත් කිරීමෙන් අනතුරුව සිද්ධිය සම්බන්ධයෙන් කටුගස්තොට පොලිසිය ද වැඩිදුර පරීක්ෂණ පවත්වනවා.
මෙතෙක් සැකකරුවන් ව අත්අඩංගුවට ගෙන නැහැ.
