දේශීය රාජ්‍ය ණය ප්‍රශස්ථකරණය සම්බන්ධයෙන් රජය ඉදිරිපත් කර ඇති පාර්ලිමේන්තු යෝජනාව රටේ ජාතික ආර්ථිකය මුහුණ දී ඇති අර්බුදයට පිළියම් සෙවීම වෙනුවේන සැළකිය යුතු සහයෝගයක් දක්වන බව හිටපු ජනාධිපති පාර්ලිමේන්තු මන්ත්‍රී මෛත්‍රීපාල සිරිසේන මහතා පවසනවා.
නිවේදනයක් නිකුත් කරමින් ඔහු සඳහන් කළේ අදාළ යෝජනාවේ කරුණු කිහිපයක් පමණක් තවදුරටත් සංවාදයට භාජනය කළ යුතුව ඇති බවයි.
යෝජිත ප්‍රශස්ථකරණ සැලසුම් මගින් වත්මන් ආර්ථික අර්බුදය හමුවේ ජනතාවගේ දුගී භාවය අවම කිරීමට ජාත්‍යන්තර මූල්‍ය අරමුදලේ සහ ලෝක බැංකුවේ ද දායකත්වය ලබා ගැනීමට අපේක්ෂිත බවත් එබැවින් මේ සම්බන්ධයෙන් අනියත බියක් ඇති කර ගැනීමට අවශ්‍ය නොමැති බවට තමා සමග සාකච්ඡා කළ ආර්ථික විශේෂඥයන් ප්‍රකාශ කළ බව මෛත්‍රීපාල සිරිසේන මහතා පෙන්වා දෙනවා.
එබැවින් රට මේ අවස්ථාවේ මුහුණ දී ඇති අසීරු ආර්ථික අර්බුදයෙන් ගොඩ ඒම සඳහා ඉදිරිපත් කර ඇති මෙම යෝජනාව යම් පාර්ශවයක් විවේචනය කරන්නේ නම් ඔවුන් ඒ සඳහා විකල්ප යෝජනාවක් ඉදිරිපත් කළ යුතු බවයි හිටපු ජනාධිපතිවරයා පෙන්වා දෙන්නේ.
ශ්‍රී ලංකා නිදහස් පක්ෂය මෙම කාර්යයේදී රට සහ ජනතාව ගැන සිතා මධ්‍යස්ථ ප්‍රතිපත්තියක් අනුගමනය කරන බව මෛත්‍රීපාල සිරිසේන මහතා නිකුත් කළ නිවේදනයේ වැඩිදුරටත් සඳහන්.
