විවාහ මංගල උත්සවයක ආශ්‍රිතයින් පිරිසකට කොවිඩ්

ඇල්ල සෞඛ්‍ය වෛද්‍ය නිලධාරී කොට්ඨාසයෙන් ආසාදිතයින් 43 දෙනෙකු හඳුනාගෙන ඇති බව එම ප්‍රදේශයේ සෞඛ්‍ය බලධාරීන් පවසයි.

එම ආසාදිතයින් අතුරින් බොහෝදෙනෙකු විවාහ මංගල උත්සවයක ආශ්‍රිතයින් බව ඔවුන් පැවසීය.

මේ අතර, හපුතලේ සෞඛ්‍ය වෛද්‍ය නිලධාරී කොට්ඨාසයෙන්ද නව ආසාදිතයින් 66 දෙනෙකු හඳුනාගෙන ඇතැයි සෞඛ්‍ය අංශ තහවුරු කළහ.

මේ අතර, ලෝක බැංකු අරමුදලේ කොවිඩ් මර්දන ව්‍යාපෘතිය මගින් ලබාදෙන රුපියල් මිලියන 386ක් වටිනා ඔක්සිජන් සැපයුම් උපකරණවල පළමු තොගය ලෙස සිරින්ජර් පම්ප් 500ක් හා හයිෆ්ලෝ ඔක්සිජන් යන්ත්‍ර 40ක් සෞඛ්‍ය අමාත්‍ය පවිත්‍රා වන්නිආරච්චි මහත්මිය වෙත භාරදීම අද (12) සිදුකෙරිණි.

මෙම උපකරණ කඩිනමින් මිලදීගැනීමේ ක්‍රමෝපාය භාවිත කරමින් සෞඛ්‍ය අමාත්‍යාංශය වෙත ලබාදී ඇත්තේ එක්සත් ජාතීන්ගේ ව්‍යාපෘති කාර්යාලය මගිනි.

මේ අතර විදෙස්ගතව සිට මෙරටට පැමිණෙන සියලු ශ්‍රී ලාංකිකයින් මෙන්ම විදේශිකයින් නිරෝධායන මධ්‍යස්ථානයක දින 14 ක අනිවාර්ය නිරෝධායන කාලසීමාවක් සම්පූර්ණ කළයුතු බවට සෞඛ්‍ය සේවා අධ්‍යක්ෂ ජනරාල්වරයා නව මාර්ගෝපදේශ නිකුත් කර තිබේ.

දේශීය හා විදේශීය රාජ්‍ය තාන්ත්‍රික කාර්ය මණ්ඩල නිලධාරීන් මෙන්ම නැව් මගින් දිවයිනට පැමිණෙන සියලුම පුද්ගලයින්ද මෙම නව මාර්ගෝපදේශයට අනුගත විය යුතු බව එහි සඳහන් වේ.