අධිකරණ විනිසුරුවරුන්ගේ විශ්රාම වයස් සීමාව දීර්ඝ කිරීමේ යෝජනාවට විරුද්ධව, ශ්රී ලංකා නීතිඥ සංගමය ඒකමතිකව යෝජනාවක් සම්මත කරගෙන තිබෙනවා.
ඒ අද (29) පැවති ශ්රී ලංකා නීතිඥ සංගමයේ විශේෂ මහ සභා රැස්වීමේ දීයි.
අද (29) උදෑසන පැවති එම සංගමයේ විශේෂ මහා සභා රැස්වීමෙන් අනතුරුව මාධ්ය වෙත අදහස් දක්වමින් නීතිඥ සංගමයේ සභාපති රජීව් අමරසූරිය සඳහන් කළේ නීතිඥවරු සියලුදෙනාම අත් ඔසවමින් ආණ්ඩුවේ අදූරදර්ශී යෝජනාවට විරෝධය දැක්වූ බවයි.
ආණ්ඩුව විසින් ගෙන එනු ලැබූ මෙම යෝජනාවට විනිසුරුවරුන් පවා විරෝධය දක්වන බව සඳහන් කර සිටි ඔහු අද දින පැමිණි සහ සූම් තාක්ෂණය ඔස්සේ එක්වූ සියලු නීතිඥයින් මෙම යෝජනාවට විරුද්ධ බව ප්රකාශ කළ බව සඳහන් කර සිටියා.
ආණ්ඩුවේ මෙම තීරණය අධිකරණයේ ස්වාධීනත්වයට දැඩි පහරක් බවත් ඒ වෙනුවෙන් ගත හැකි සියලු ක්රියාමාර්ග ඉදිරියේ දී ගන්නා බවත් සභාපතිවරයා වැඩිදුරටත් අදහස් දක්වමින් පැවසුවා.
මේ අතර මාස දෙකක පමණ සිට ශ්රී ලංකා නීතිඥ සංගමය මෙම යෝජනාවට විරෝධය පළ කල ද ආණ්ඩුව මේ පිළිබඳ සාකච්ඡා කිරීමට තවමත් අවස්ථාවක් නොදුන් බවද ඔහු සඳහන් කළ අතර, අද (29) පස්වරු 5ට අධිකරණ අමාත්යවරයා හමුවීමට නියමිත බවද එම සංගමයේ සභාපති, නීතිඥ රජීව් අමරසූරිය වැඩිදුරටත් අදහස් දක්වමින් පවසා සිටියා.
