විදේශ රැකියා නියාමනය කිරීම, ශ්රී ලාංකික විගමනික ශ්රමිකයන්ගේ සුබසාධනය සුරක්ෂිත කිරීම සහ විදේශ රැකියා අවස්ථා ප්රවර්ධනය කිරීම සඳහා 1985 අංක 21 දරන ශ්රී ලංකා විදේශ සේවා නියුක්ති කාර්යාංශ පනත හඳුන්වා දී තිබෙනවා.
විදේශ රැකියා ක්ෂේත්රයේ වර්තමාන ප්රවණතාවන්ට ගැළපෙන පරිදි ප්රතිචාර දැක්වීමට සහ ජාතික ප්රමුඛතාවන් හා ජාත්යන්තර ප්රමිතීන් සමග අනුගත වීමට හැකි වන පරිදි දැනට පවතින ව්යවස්ථාපිත රාමුව නවීකරණය කිරීමේ අවශ්යතාව හඳුනා ගෙන ඇති බව කැබිනට් මාධ්ය ප්රකාශක අමාත්ය නලින්ද ජයතිස්ස සඳහන් කළා.
එම අවශ්යතාව සඳහා 1985 අංක 21 දරන ශ්රී ලංකා විදේශ සේවා නියුක්ති කාර්යාංශ පනත ඉවත් කර නව පනතක් හඳුන්වා දීමට අපේක්ෂා කරන බවද අමාත්යවරයා කියා සිටියා.
ඒ අනුව, විදේශ රැකියා ක්ෂේත්රය සම්බන්ධයෙන් වන නීතිමය සහ ආයතනික රාමුව නවීකරණය කිරීමට සහ ශක්තිමත් කිරීමට අදාළව සංකල්ප පත්රිකාවක් සකස් කරනු ලැබ තිබෙනවා.
එකී සංකල්ප පත්රිකාව මත පදනම්ව, 1985 අංක 21 දරන ශ්රී ලංකා විදේශ සේවා නියුක්ති කාර්යාංශ පනත ඉවත් කරමින් නව පනතක් හඳුන්වා දීමට හැකි වන පරිදි පනත් කෙටුම්පතක් සකස් කරන ලෙස නීති කෙටුම්පත් සම්පාදකට උපදෙස් දීම පිණිස විදේශ කටයුතු, විදේශ රැකියා සහ සංචාරක අමාත්යතුමා ඉදිරිපත් කළ යෝජනාව අමාත්ය මණ්ඩලය විසින් අනුමත කර තිබෙනවා
