විදේශික සංචාරකයන් ගිය මෝටර් රථයකට වන අලියෙකු පහරදෙයි (ඡායාරූප)

කුඩා බිළිඳෙකු සහ තවත් කුඩා දරුවෙකු ද ඇතුලුව විදේශික සංචාරකයන් 4 දෙනෙකු ගමන් ගත් මෝටර් රථයකට වන අලියෙකු පහරදී තිබෙනවා.

අද පෙරවරු 11ට පමණ පොළොන්නරුව හබරණ මාර්ගයේ මින්නේරියට ආසන්න කැලෑබද ප්‍රදේශයකදී වන අලියා වාහනයට පහරදී ඇති බවයි අප වාර්තාකරු සඳහන් කළේ.

වාහනයේ ගමන් කර ඇත්තේ මාස 10ක බිළිඳෙක්, අවුරුදු 8ක පිරිමි දරුවෙක් සහ අවුරුදු 33 සහ 36 වයස්වල පසුවන අඹුසැමි යුවළක්.

ඔවුන් රුසියානු ජාතික සංචාරකයන් පිරිසක් බවටයි හෙළිවී ඇත්තේ.

ඔවුන් මෝටර් රථයෙන් හබරණ දෙසට ගමන් කරමින් සිටියදී වන අලියෙකු දැක වාහනය නතර කර ඉන් බැස අලියාගේ ඡායාරූප ලබා ගැනීමට උත්සාහ කර තිබෙනවා.

එහිදී වන අලියා මෝටර් රථය අසලට පැමිණ එය ඉවතට තල්ලු කිරීම හේතුවෙන් අනතුර සිදුව ඇති බවයි මූලික විමර්ශනවලදී හෙළිවී ඇත්තේ.

වන අලියා කළ පහරදීමෙන් මෝටර් රථයේ පිටුපස දොරේ වීදුරුවට සහ පැති කණ්නාඩියකට අලාභ හානි සිදුවී තිබෙනවා.

රථයේ ගමන් කළ කිසිවෙකුට හානියක් සිදුවී නොමැති බවයි වාර්තා වන්නේ.

මෙම මෝටර් රථය විදේශික යුවළ විසින් මාතර ප්‍රදේශයෙන් කුලී පදනම මත ලබාගෙන තිබූ එකක් බව සඳහන්.

සිද්ධිය සම්බන්ධයෙන් මින්නේරිය පොලිසිය පරීක්ෂණ ආරම්භ කර ඇති අතර මෝටර් රථය සහ විදේශිකයන් ද පොලිසියට රැගෙන ගොස් තිබෙනවා.