දෝහා කටාර් රාජ්‍යයයේ රැකියා ලබා දෙන බව පවසා මුදල් වංචා කළ පුද්ගලයකු විදේශ සේවා නියුක්ති කාර්යංශය මගින් අත්අඩංගුවට ගෙන තිබෙනවා.
විදේශ සේවා නියුක්ති කාර්යංශයට ලැබුණු පැමිණිලි 06ක් මත සිදු කළ විමර්ශන අනුවයි විදේශ සේවා නියුක්ති කාර්යංශයේ නිතී අංශය මගින් අදාළ සැකකරු එප්පාවල, එළියදිවුල්වැව පිහිටි නිවසේ රැදී සිටියදී අත්අඩංගුවට ගෙන ඇත්තේ.
රැකියා ලබා දෙන බව පවසා මුදල් වංචා කළ බවට පැමිණිලි කළ පිරිසගෙන් සැකකරු රුපියල් ලක්ෂ 16ක පමණ මුදල් වංචා කර ඇති බවට වංචාවට හසුවූ පිරිස් මුදල් බැංකු ගත කළ රිසිට්පත් මගින් තහවුරු වී ඇතැයි සඳහන්.
මෙම පුද්ගලයා විසින් විශ්‍රාමික යුද, ගුවන් සහ නාවික යන ත්‍රිවිධ හමුදා නිලධාරීන් හා පොලිස් නිලධාරීන්ට මෙලෙස වංචා සිදු කර ඇති බව හෙළිවී තිබෙනවා.
විදේශ සේවා නියුක්ති කාර්යාංශයට ලැබුණු පැමිණිලි 06ට අමතරව මෙම පුද්ගලයා විසින් තවත් වංචාවන් සිදු කර ඇති බවට තොරතුරු ලැබී ඇති අතර ඒ සම්බන්ධයෙන් ද පරීක්ෂණ සිදු කරන බවයි කාර්යංශය ප්‍රකාශ කළේ.
රැකියා සම්බන්ධයෙන් විමසීමට මුදල් ලබා දුන් පුද්ගලයින් පැමිණි අවස්ථාවන්වලදී සැකකරු විසින් බැන පහර දීමට උත්සහ කර මුදල් ලබා දීම මග හැර ඇති බවට ද එප්පාවල පොලිසියට පැමිණිලි ලැබී තිබෙනවා.
සැකකරුගෙන් කළ ප්‍රශ්න කිරීම්වලදී ඔහු පවසා ඇත්තේ තමන් ද අතරමැදියකු වන අතර වෙනත් පුද්ගලයකුට රැවටී මෙම මුදල් ඔහුට ලබා දී ඇති බවයි.
අත්අඩංගුවට ගත් සැකකරු එප්පාවල පොලිස් ස්ථානයට භාර දී ඇති අතර ඔහු අද අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව තිබෙනවා.
