විදුලි ගාස්තුව ඉහළ දැමීමට එරෙහිව හා තවත් ඉල්ලීම් කිහිපයක් මුල් කර ගනිමින් ලබන 22වනදා දැවැන්ත විරෝධතාවක් පවත්වන බව ලංකා විදුලි බල මණ්ඩලයේ ඒකාබන්ධ වෘත්තීය සමිති සංධානය පවසනවා.
එහි කැඳවුම්කරු රංජන් ජයලාල් පැවසුවේ කොළඹ කොටුව දුම්රිය ස්ථානය අසලදී එම විරෝධතාව ආරම්භ කරන බවයි.
මේ අතර විදුලි ගාස්තු ඉහළ දැමීමට එරෙහිව ඇගලුම්, කර්මාන්ත, ඉදි කිරීම් ඇතුළු ක්ෂේත්‍ර රැසකම පිරිස්ද දිගින් දිගටම රජයට විරෝධය පළ කරනවා.
මේ අතර විදුලි බිල ඉහළ දැමිමට විරෝධය දක්වමින් ජාතික ජන බලවේගය සංවිධානය කළ උද්ඝෝෂණයක් ඊයේ (18) පස්වරුවේ තංගල්ල නගරයේදී පැවැත් වුණා
විදුලි ගාස්තු ඉහළ දැමීම වාහාම අත්හිටුවනු, ප්‍රජාතන්ත්‍රවාදය වැළලීමේ ආණ්ඩුවේ බියගුළු අත්සහය පරදවමු, ජනතාවගේ ඡන්ද අයිතියට අත නොතබමු යන සටන් පාඨ මූලික කර ගනිමින් විරෝධතාවයේ නිරත වූ උද්ඝෝෂකයන් තංගල්ල නගරයේ සටන් පාඨ සහිත පුවරු ප්‍රදර්ශනය කරමින් විරෝධතාවයේ නිරත වූ බවයි අප වාර්තාකරුවන් කියාසිටියේ.
විරෝධතාවයට 1200කට අධික පිරිසක් සහභාගී වී සිටි අතර මෙම අවස්ථාවට සමාජවාදී තරුණ සංගමයේ හම්බන්තොට දිස්ත්‍රීක් සංවිධායක සුරංග සංජීව, ජාතික ජනබල වේගයේ හම්බනතොට දිස්ත්‍රීක් විධායක සභික රුවන් ප්‍රභා සෙනරත් ඇතුළු පිරිසක් එක්ව සිටියා.
