උසස් පෙළ විභාගය පැවැත්වෙන කාලසීමාව තුල විදුලි කප්පාදුව සිදු කිරීම සම්බන්ධයෙන් තවත් සාකච්ඡාවක් සඳහා මානව හිමිකම් කොමිසම අද පස්වරුවේ මහජන උපයෝගීතා කොමිසම සහ විදුලිබල මණ්ඩලය ඇතුළු ආයතන කිහිපයක නිලධාරීන් පිරිසක් කැඳවා තිබෙනවා.
අධ්‍යයන පොදු සහතික පත්‍ර උසස් පෙළ විභාගය සඳහා පෙනී සිටින අපේක්ෂකයින්ගේ අධ්‍යාපන අයිතියට බාධාකාරි තත්වයක් දිවයින තුළ දැනට ක්‍රියාත්මක වන විදුලි කප්පාදුව ඔස්සේ ඇති වී ඇති බව නිරීක්ෂණය වන බවයි ශ්‍රී ලංකා මානව හිමිකම් කොමිෂන් සභාව කියාසිටියේ.
එබැවින්, විදුලිබල හා බලශක්ති අමාත්‍යාංශයේ ලේකම්වරයා සහ ශ්‍රී ලංකා මහජන උපයෝගීතා කොමිෂන් සභාවේ සභාපතිවරයා අද පෙරවරුවේ ශ්‍රී ලංකා මානව හිමිකම් කොමිෂන් සභාව වෙත කැඳවා තිබුණා.
ඒ අනුව ශ්‍රී ලංකා මහජන උපයෝගීතා කොමිෂන් සභාවේ සභාපතිවරයා, විදුලිබල හා බලශක්ති අමාත්‍යාංශයේ අතිරේක ලේකම්වරයෙකු, සහ ලංකා විදුලිබල මණ්ඩලයේ ඉහළ නිලධාරීන් කිපදෙනෙකු අද දින සාකච්ඡාවට සහභාගී වුණා.
මෙම සාකච්ඡාවේදී මතු වු ගැටළු සම්බන්ධව කඩිනම් මැදිහත්වීමක් අත්‍යාවශ්‍ය බැවින් අද දින පස්වරු 04ට ශ්‍රී ලංකා මානව හිමිකම් කොමිෂන් සභාව විසින් තවත් හදිසි සාකච්ඡාවක් කැඳවා තිබෙනවා.
ඒ අනුව මෙම සාකච්ඡාව විදුලිබල හා බලශක්ති අමාත්‍යාංශයේ සඳහා ලේකම්, ශ්‍රී ලංකා මහජන උපයෝගීතා කොමිෂන් සභාවේ සභාපති, ලංකා විදුලි බල මණ්ඩලයේ සභාපති, ඛනිජ තෙල් නීතිගත සංස්ථාවේ සභාපති, මෙන්ම ලංකා බැංකුවේ මහජන බැංකුවේ සභාපතිවරුන් කැඳවා ඇති බවයි මානව හිමිකම් කොමිසම කියාසිටියේ.
