දිවයිනේ නිරිගදිග ප්‍රදේශවල පවතින වැසි තත්ත්වය තවදුරටත් බලාපොරොත්තු වන බව කාලගුණ විද්‍යා දෙපාර්තමේන්තුව පවසනවා.
බස්නාහිර, සබරගමුව, දකුණ සහ වයඹ පළාත්වලත් මහනුවර සහ නුවරඑළිය දිස්ත්‍රික්වලත් විටින් විට වැසි හෝ ගිගුරුම් සහිත වැසි ඇතිවිය හැකියි.
බස්නාහිර, සබරගමුව සහ දකුණු පළාත්වල ඇතැම් ප්‍රදේශවලට මිලිමීටර් 75ට වැඩි තරමක් තද වැසි ද බලාපොරොත්තු විය හැකි බවයි කාලගුණ විද්‍යා දෙපාර්තමේන්තුව ප්‍රකාශ කළේ.
ඌව සහ නැගෙනහිර පළාත්වලත් පොළොන්නරුව සහ මුලතිව් දිස්ත්‍රික්වලත් සවස් කාලයේදී හෝ රාත්‍රී කාලයේදී තැනින් තැන වැසි හෝ ගිගුරුම් සහිත වැසි ඇතිවීමේ හැකියාවක් ද පවතිනවා.
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසටයි ජනතාවගෙන් ඉල්ලීමක් කෙරෙන්නේ.
මේ අතර ජාතික ගොඩනැගිලි පර්යේෂණ සංවිධානය සඳහන් කළේ පවතින අධික වර්ෂාව හේතුවෙන් නිවාස අසල ඇති කණ්ඩි කඩා වැටීම් සහ ගල් පෙරලීම් මඟින් නිවාස හානිවීම් වාර්තා වන බවයි.
මේ හේතුවෙන් නායයෑම් අවදානම් සහිත ප්‍රදේශවල ජීවත් වන්නේ නම් නිවස අවට ඇති කාණු පද්ධතිය වැසි ජලය ඉක්මනින් ගලායන පරිදි සකස් කර ගන්නා ලෙසට උපදෙස් දෙන අතර නිවසට ඉහළ උස් කණ්ඩිවල ඇති නිවසට බර වූ ගස් හැකිතාක් ඉවත් කර ගන්නා ලෙසට ද උපදෙස් ලබාදී තිබෙනවා.
නිවස පිටුපස ඇති උස් කණ්ඩි හරහා වැසි ජලය ගලා නොයන ලෙස කණ්ඩියට ඉහළ කාණු පද්ධතිය සකසා ගත යුතු අතර නිවසෙහි වහලෙන් වැටෙන වැසි ජලය නිවස ඉදිරිපස ඇති කණ්ඩිය හරහා බැස නොයන අයුරින් කාණු පද්ධතිය සකසා ගැනීම පිළිබඳ සැලකිලිමත් වන ලෙසටයි ජාතික ගොඩනැගිලි පර්යේෂණ සංවිධානය ජනතාවට දැනුම් දෙන්නේ.
