මෙවර පළාත් පාලන මැතිවරණය කළුතර දිස්ත්‍රික්කය වළල්ලාවිට ප්‍රාදේශීය සභාව පිහිටුවීම අද (25) උදෑසන බස්නාහිර පළාත් පාලන කොමසාරිස් සාරංගි කල්හාරි ජයසුන්දර මහත්මියගේ ප්‍රධානත්වයෙන් මීගහතැන්න පිහිටි වළල්ලාවිට ප්‍රාදේශීය සභාවේ දී සිදු කෙරුණා.
සමස්ත මන්ත්‍රී ධුර 26කින් සමන්විත වලල්ලාවිට ප්‍රාදේශීය සභාව සඳහා සභාපති ධුරය සඳහන් නම් තුනක් යෝජනා වූ අතර ඒ අනුව ජාතික ජන බලවේගයෙන් සුනිල් අබේසිරි මහතාගේ නම යෝජනා වූ අතර, සමගි ජනබලවේගයෙන් සභාපති ධුරය සඳහා ඉන්දික මල්ලවආරච්චි මහතාගේ නම ද ශ්‍රී ලංකා පොදුජන පෙරමුණ පොහොට්ටුව පක්ෂයෙන් උදේනි අතුකෝරාල මහතාගේ නම ද යෝජනා වූ බවයි වාර්තාකරු පැවසුවේ.
සභාපති ධුරය තෝරා ගැනීම සඳහා විවෘත ජන්ද ක්‍රමයට මෙන්ම රහස් ඡන්ද ක්‍රමයට යෝජනා දෙකක් ඉදිරිපත් වූ බැවින් පනතේ ප්‍රකාරව සභාපති ධුරය සඳහා රහස් ඡන්දය යොදා ගැනීමට කොමසාරිස්වරිය කටයුතු කළා.
පැවති රහස් ඡන්දයෙන් ජාතික ජනබලවේගයෙන් ඉදිරිපත් වූ අපේක්ෂකයාා මනාප 16 ලබාගත් අතර, සමගි ජන බලවේගයෙන් ඉදිරිපත් වූ අපේක්ෂකයා මනාප 5ක් ලබා ගත්තා.
ශ්‍රී ලංකා පොදුජන පෙරමුණ පොහොට්ටුවෙන් ඉදිරිපත් වූ අපේක්ෂකයා ලබාගත්තේ ඡන්ද තුනක් පමණයි.
ඒ අනුව මනාප 16ක් ලබා ගත් ජාතික ජනබලවේග අපේක්ෂක සුනිල් අබේසිරි මහතා වලල්ලාවිට ප්‍රාදේශීය සභාවේ සභාපතිවරයා වශයෙන් තේරී පත් වුණා.
