ණය අර්බුදයත් සමග බදු වැඩි කිරීම හේතුවෙන් රට පුරා මතුව තිබෙන මහජන නොසන්සුන්තාවන් මැද කෙන්යාව නිමා වූ මූල්‍ය වර්ෂය සඳහා ඇමෙරිකානු ඩොලර් බිලියනයක චීන ණය ආපසු ගෙවා ඇතැයි වාර්තා වනවා.
දුම්රිය සේවය නවීකරණය ඇතුළු යටිතල පහසුකම් සංවර්ධන ව්‍යාපෘති සඳහා මෙම ණය ලබාගෙන ඇතැයි කෙන්යාවේ දිනපතා පුවත්පතක් වන බිස්නස් ඩේලි වාර්තා කළා.
ඉන් මිලියන 703ක් ප්‍රාග්ධන ආපසු ගෙවීම් වන අතර ඉතිරි කොටස ණය පොලී ගෙවීම් වනවා.
ණය සේවාකරණය පසුගිය වසරට සාපේක්ෂව සියයට 42.14කින් ඉහළ ගොස් ඇතැයි පුවත්පත් වාර්තාවේ සඳහන්.
කෙන්යානු මුදල් ඒකකය අවප්‍රමාණය වීම සහ වෙනස්වන පොලී අනුපාත මත පොලිය සංශෝධනය කිරීම ණය සේවාකරණය ඉහළ යෑම කෙරෙහි බල පෑ බව භාණ්ඩාගාර ප්‍රකාශකයෙක් බිස්නස් ඩේලි පුවත්පත සමග පවසා තිබුණා.
මේ වසරේ මැයි මාසය වන විට කෙන්යාව , චීනයට ආපසු ගෙවිය යුතු ණය ප්‍රමාණය ඩොලර් බිලියන 5.4ක්.
ඉහළ ණය සේවාකරණ පිරිවැය හෙතුවෙන් අධ්‍යාපනය, සෞඛ්‍ය සේවා සහ නිවාස සංවර්ධන ව්‍යාපෘති සඳහා ප්‍රමාණවත් ලෙස අරමුදල් සැපයීම සඳහා ජනාධිපති විලියම් රූටෝගේ පරිපාලනයේ මූල්‍ය අවකාශය සීමා වී ඇතැයි එක්සත් ජනපදය විසින් අනතුරු අඟවා ඇති පසුබිමක චීනය වෙත ණය ගෙවීම් වැඩි වී ඇති බව Business Daily හි වාර්තාවේ සඳහන්.
