වසන්ත මුදලිගේ පොලිස් අත්අඩංගුවට

අන්තර් විශ්ව විද්‍යාලයීය ශිෂ්‍ය බල මණ්ඩලයේ කැඳවුම්කරු වසන්ත මුදලිගේ පොලිස් අත්අඩංගුවට ගෙන තිබෙනවා.

ඔහු ඇතුලු 56 දෙනෙකු මෙලෙස අත්අඩංගුවට ගෙන ඇත්තේ අධ්‍යාපන අමාත්‍යංශයට බලහත්කාරයෙන් ඇතුලු වීමේ චෝදනා මතයි.

ශ්‍රී ලංකා බෞද්ධ හා පාලි විශ්වවිද්‍යාලයේ ශිෂ්‍ය භික්ෂූන් වහන්සේලා 30 නමක් ඇතුළු 56කට ආසන්න පිරිසක් මෙලෙස අත්අඩංගුවට ගෙන ඇති බවයි පොලිසිය ප්‍රකාශ කළේ.

හෝමාගම, පිටිපන පිහිටි බෞද්ධ හා පාලි විශ්වවිද්‍යාලය යළි විවෘත කරන ලෙස බලකරමින් එම පිරිස අද විරෝධතාවක නිරත වී අධ්‍යාපන අමාත්‍යාංශයට ඇතුළු වී තිබුණා.

ඊයේ (22) පැවති සත්‍යග්‍රහය විසුරුවා හැරීමට කඳුළු ගෑස් සහ ජල ප්‍රහාර එල්ල කිරීම සම්බන්ධයෙන් පොලිසියට එරෙහිව පියවර ගන්නා ලෙස ද විරෝධතාකරුවන් ඉල්ලා සිටියා.

ශ්‍රී ලංකා බෞද්ධ හා පාලි විශ්වවිද්‍යාලය පළමු වසරේ සිසුන් සඳහා පමණක් විවෘත කරන බව එහි උපකුලපති මහාචාර්ය පුජ්‍ය නෙළුවේ සුමනවංශ හිමියන් ප්‍රකාශ කිරීමත් සමඟයි මෙලෙස විරෝධතා ආරම්භ වී ඇත්තේ.

නෙළුවේ සුමනවංශ හිමියන් පැවසුවේ 27 වන දින පළමු වසර සිසුන් සඳහා පමණක් විශ්ව විද්‍යාලය විවෘත කරන බවයි.

සියලුම සිසුන් සඳහා එකවර විශ්වවිද්‍යාලය විවෘත කිරීමට නොහැකි වූ බවත්, පියවරෙන් පියවර විශ්වවිද්‍යාලය විවෘත කිරීමට පරිපාලන මණ්ඩලය උපදෙස් දී ඇති බවත් උන්වහන්සේ සඳහන් කළා.