Update:- අතුරුගිරියේ දී අද (08) පෙරවරුවේ ප්‍රසිද්ධ ව්‍යාපාරික ක්ලබ් වසන්ත නොහොත් සුරේන්ද්‍ර වසන්ත ඇතුළු පිරිසකට වෙඩි තැබීමේ සිද්ධියට සම්බන්ධ වෙඩික්කරුවන් පලා ගිය දෙවැනි රථය ද පොලිස් භාරයට ගැනීමට මීට ටික වේලාවකට පෙර හැකි වී තිබෙනවා.
පොලිස් මාධ්‍ය ප්‍රකාශක කාර්යාලය පවසන්නේ; මෙම අපරාධකරුවන් දෙවැනි වර ගොඩවුණු සුදු පැහැති වෑන් රථය ද බුලත්සිංහල – දෙල්මැල්ල ප්‍රදේශයේ මාර්ගයක දමා ගොස් තිබියදී සොයා ගත් බවයි.
අද පෙරවරුවේ අතුරුගිරිය නගරයේ ටැටූ නිර්මාණ කටයුතු සිදු කරන ආයතනයක් විවෘත කිරීමේ ප්‍රධාන ආරාධිත අමුත්තා ලෙස එක් වූ ක්ලබ් වසන්ත නොහොත සුරේන්ද්‍ර වසන්ත සහ එම ප්‍රදේශයේ ම වෙසෙන නයන වාසල නමැත්තෙකු මෙම වෙඩි පහරින් ජීවිතක්ෂයට පත් වුණා.
එම වෙඩි පහරින් මෙරට ජනප්‍රිය ගායන ශිල්පිනී කේ. සුජීවා, සුරේන්ද්‍ර වසන්තගේ බිරිඳ සහ ව්‍යාපාරික ආයතනය හිමිකරුගේ බිරිඳ ඇතුළු සය දෙනෙකු බරපතළ තුවාල ලබා රෝහල්ගත කෙරුණා.
වෙඩි තැබීමෙන් පසු අපරාධකරුවන් දෙදෙනා පැමිණි සුදු පැහැති මෝටර් රථයෙන් අතුරුගිරියේ සිට කඩුවෙල දක්වා පලා ගිය අතර; පසුව කොරතොට ප්‍රදේශයේ දී ඔවුන් මෝටර් රථයෙන් බැස සුදු පැහැති වෑන් රථයකට මාරුවෙන අයුරුයි අසල සවිකර තිබූ සීසීටීවී දර්ශනවල සටහන් ව ඇත්තේ.
පසුව ඔවුන් පැන ගිය වෑන් රථය සොයා විශේෂ පොලිස් කණ්ඩායම් කිහිපයක් පරීක්ෂණ කටයුතු ආරම්භ කළ අතර; එහි ප්‍රතිඵලයක් ලෙසයි මහ මග දමා ගොස් තිබූ මෙම වෑන් රථය අද රාත්‍රියේ දී පොලිසිය විසින් සොයා ගනු ලැබුවේ.
සිද්ධිය සම්බන්ධයෙන් පුළුල් විමර්ශන ක්‍රියාත්මකයි.
