සිවිල් ආරක්ෂක දෙපාර්තමේන්තුව යම් ආකාරයකින් ක්‍රියාත්මක වීමේ වැඩපිළිවෙළක් සකස්කරන ලෙස කෝපා කමිටුවේ සභාපති රාජ්‍ය අමාත්‍ය ලසන්ත අලගියවන්න මහතා එම දෙපාර්තමේන්තුවට උපදෙස් ලබාදී තිබෙනවා.
රාජ්‍ය අමාත්‍ය ලසන්ත අලගියවන්න මහතා මෙම උපදෙස් ලබාදුන්නේ සිවිල් ආරක්ෂක දෙපාර්තමේන්තුවේ 2019/2020/2021 වර්ෂවල විගණකාධිපති වාර්තා සහ වර්තමාන කාර්යසාධනය පිළිබඳ පරීක්ෂාකිරීම සඳහා රජයේ ගිණුම් පිළිබඳ කාරක සභාව පාර්ලිමේන්තුවේදී රැස් වූ අවස්ථාවේදී යි.
එසේම සිවිල් ආරක්ෂක දෙපාර්තමේන්තුව සම්බන්ධව රාජ්‍ය ප්‍රතිපත්තියට ගැලපෙන ලෙස ඉදිරි කටයුතු කිරීම පිළිබඳව නීතිමය රාමුවක් සැකසීම සම්බන්ධයෙන් සැප්තැම්බර් 11 වනදාට පෙර, දින වකවානු සහිත වාර්තාවක් කෝපා කමිටුවට ලබාදෙන ලෙසටයි ලසන්ත අලගියවන්න මහතා නිර්දේශ කළේ.
මෙහිදී පැමිණ සිටි නිලධාරීන් පෙන්වා දුන්නේ වසර තුනහමාරකින් සිවිල් ආරක්ෂක දෙපාර්තමේන්තුවට බඳවාගැනීම් සිදු කර නොමැති අතර සිවිල් ආරක්ෂක බලකාය ක්ෂයවීමේ හමුදාවක් ලෙස මේ වන විට නම් කර ඇති බවයි.
එසේම සිවිල් ආරක්ෂක බලකාය සතුව මේ වන විට 33687ක් සේවය කරන බව ද පැමිණ සිටි නිලධාරීන් පෙන්වා දුන් අතර එම පිරිස අනුයුක්ත කර ඇති ස්ථාන සහ සේවාවන් පිළිබඳව ද සඳහන් කර තිබෙනවා.
මෙහිදී ආරක්ෂක අමාත්‍යාංශය ලේකම් කමල් ගුණරත්න විසින් මෙම බලකාය පිහිටුවීම පිළිබඳව සහ එහි කටයුතු සිදුවූ ආකාරය පිළිබඳව පැහැදිලි කිරීම සිදු කරනු ලැබුවා.
තවද අවශ්‍යතාව ඉක්මවා සිදු කළ මිලදීගැනීම් පිළිබඳව, මෙම දෙපාර්තමේන්තුව විසින් සිදු කළ ව්‍යාපෘති පිළිබඳව සහ මෙම බලකාය විසින් වගාකළ ධාන්‍ය, අස්වැන්න විකිණීම පිළිබඳවද මෙහිදී සාකච්ඡා කර තිබෙනවා.
