පානදුර, ගොරකාන ප්රදේශයේදී බොල්ගොඩ ගඟේ දියේ ගිලීමට ලක් වූ වයෝවෘද්ධ කාන්තාවක් පානදුර උතුර පොලිසිය සහ ගොරකාන පවුල් සෞඛ්ය සේවා නිලධාරිනීයගේ මැදිහත් වීමෙන් බේරා ගැනුණු පුවතක් අද (01) වාර්තා වුණා.
එම කාන්තාව උදෑසන කාලයේදී බොල්ගොඩ ගඟේ මුහුණ සෝදමින් සිටින අවස්ථාවේ ඇයට ඇති වූ ක්ලාන්ත ගතියක් හේතුවෙන් ඇය ගඟට වැටී ගසා ගොස් ඇති බවයි පැවසෙන්නේ.
මෙම අනතුර සම්බන්ධයෙන් ගම්වාසීන් විසින් ගොරකාන පවුල් සෞඛ්ය සේවා නිලධාරිනීය දැනුවත් කර ඇති අතර ඇය විසින් පානදුර උතුර පොලීසිය මේ සම්බන්ධයෙන් දැනුවත් කර තිබෙනවා.
ඒ අනුව ක්රියාත්මක වූ පානදුර උතුර පොලිස් ස්ථානාධිපති ඇතුළු නිලධාරීන් කිහිපදෙනෙක් සිද්ධිය වාර්තා වූ ස්ථානයට පැමිණ ඇති අතර වහාම ඒ අසල තිබූ අබලන් බෝට්ටුවක් මඟින් හබලක ආධාරයෙන් ගඟ මැදට ගොස් එම කාන්තාව බේරා ගැනීමට ඔවුන් කටයුතු කර තිබෙනවා.
පොලිස් නිලධාරින් කිහිපදෙනෙක් සහ පවුල් සෞඛ්ය සේවා නිලධාරිනීය රැගත් බෝට්ටුවෙන් ගොස් එම කාන්තාව බේරා ගන්නා අවස්ථාව වන විටත් ඇය බොහෝ වෙලාවක සිට වතුරේ සිට ඇති බවයි පොලිසිය පවසන්නේ.
නිලධාරීන් පිරිස ඇය අසළට යන අවස්ථාවේ ඇය දැලක පැටලී සිට ඇති අතර කොන්ක්රීට් කණුවක් අල්ලා ගෙන සිට තිබෙනවා.
පසුව ඇයව ගොඩට ගෙන්වා ගෙන ඇයට අවශ්ය ඇදුම් පැළදුම් ප්රදේශවාසීන් විසින් ලබා දීමට කටයුතු කර තිබෙනවා.
මෙම කාන්තාව 67 හැවිරිදි හපුතලේ ප්රදේශයේ පදිංචිකාරියක් බවත් ඇය ගොරකාන ප්රදේශයේ තම පුතුගේ නිවසට පැමිණ ඇති බවත් පොලිසිය පවසා සිටියා.
