යාපනය – ඉලුප්පුකඩුවායි අඩම්පන් අධිරක්ෂිතයට අනවසරයෙන් ඇතුළු වී ස්වාභාවික පරිසරය වනසමින් අක්කර 05 ක පමණ භූමි ප්‍රමාණයක ගස්වැල් කපා වනසමින් සිටි පුද්ගලයන් දෙදෙනෙකු පොලිස් විශේෂ කාර්ය බලකාය අත් අඩංගුවට ගෙන තිබෙනවා.
ඊයේ (04) පස්වරුවේ විශේෂ කාර්ය බලකාය ඉලුප්පුකඩවායි කඳවුරේ නිලධාරීන්ට ලද තොරතුරකට අනුව අඩම්පන් රක්ෂිත ප්‍රදේශයේදීයි මෙම වැටලීම සිදු කර ඇත්තේ.
වැටලීම සිදු කරන අවස්ථාවේදීත් ස්වාභාවික පරිසරය වනසමින් අනවසරයෙන් අඩම්පන් රක්ෂිතයට ඇතුළුවී පරිසරයට දැඩි හානි ගෙනදෙමින් එහි ජෛව විවිධත්වයට ද බලපෑම් ඇති වන සේ JCB යන්ත්‍රයක් සහ ට්‍රැක්ටර් රථයක් යොදා ගනිමින් අක්කර 05ක පමණ භූමි ප්‍රමාණයක කපා එළි කරමින් සිටි පුද්ගලයින් දෙදෙනකු මෙලෙස අත් අඩංගුවට ගැනුණා.
සැකකරුවන් කුඹුක්වැව හා කිලිනොච්චිය ප්‍රදේශයේ පදිංචි වයස අවුරුදු 33, 66 පසුවන පුද්ගලයින් දෙදෙනෙකු බවයි වාර්තා වන්නේ.
සිද්ධිය සම්බන්ධයෙන් වැඩිදුර විමර්ශන කටයුතු අඩම්පන් අඩවිවන කාර්යාලය මගින් සිදු කරනවා.
