ප්‍රදේශ කිහිපයක වන අලි පහරදීම්වලින් පුද්ගලයන් තුන් දෙනෙකු මියගොස් තිබෙනවා.
අරලගංවිල, තත්තිරිමලේ සහ හඳපානාගල ප්‍රදේශවලදීයි මෙම වන අලි පහරදීම් සිදුවී ඇත්තේ.
අද උදෑසන අරලගංවිල දිවුල්දමන ප්‍රදේශයේදී එල්ල වූ වන අලි ප්‍රහාරයකින් මරණයට පත්වූයේ 60 හැවිරිදි පුද්ගලයෙක්.
ඔහු දිවුල්දමන ප්‍රදේශයේම පදිංචිකරුවෙක් බවයි පොලිසිය සඳහන් කළේ.
මෘත ශරීරය පශ්චාත් මරණ පරීක්ෂණය සඳහා පොළොන්නරුව රෝහලට රැගෙන ගොස් තිබෙනවා.
මේ අතර අනුරාධපුර තන්තිරිමලේ ප්‍රදේශයේදී වැවක දිය නෑමට ගිය පුද්ගලයෙකු වන අලි ප්‍රහාරයකින් මරණයට පත්වුණා.
ඊයේ සවස කුලී වැඩ අවසන් කර පැමිණ දිය නෑමට යාමේදී ඔහු වන අලි ප්‍රහාරයට ලක්ව ඇති බවයි අප වාර්තාකරු සඳහන් කළේ.
තුවාලකරු මහවිලච්චිය රෝහලට රැගෙන යන විටත් මරණයට පත්ව සිටි බව සඳහන්.
ප්‍රදේශවාසීන් පෙන්වා දෙන්නේ තම ගම් ප්‍රදේශයේ මේවන විට වන අලි පහරදීම් හේතුවෙන් 10 දෙනෙකු පමණ මරණයට පත්වී ඇති බවයි.
ඊට පිළියමක් සලසා දෙන ලෙසට ඔවුන් රජයෙන් ඉල්ලීමක් කරනවා.
මේ අතර වැල්ලවාය හඳපානාගල ප්‍රදේශයේදී ද වන අලි පහරදීමකින් පුද්ගලයෙකු ජීවිතක්ෂයට පත්වුණා.
ඊයේ සවස ඔහු හඳපානාගල වැව් රක්ෂිතයේ මසුන් ඇල්ලීම සඳහා යමින් සිටියදී වන අලියාගේ පහරදීමට ලක්ව ඇති බවයි පොලිසිය කියාසිටියේ.
මියගොස් ඇත්තේ වැල්ලවාය නෙලුවගල ප්‍රදේශයේ පදිංචිව සිටි 55 හැවිරිදි පුද්ගලයෙක්. මෘත ශරීරය වැල්ලවාය රෝහලේ තැන්පත් කර තිබෙනවා.
