වතු කම්කරුවන් සඳහා ස්ථිර තැපැල් ලිපින ලබා දීමට ඇති ඉඩකඩ සම්බන්ධයෙන් වැවිලි කර්මාන්ත අමාත්‍යංශයේ ලේකම්වරයා කරුණු අධ්‍යයනය කරමින් සිටින බව නීතිපතිවරයා ශ්‍රේෂ්ඨාධිකරණයට දැනුම් දී තිබෙනවා.
වතු කම්කරුවන් සඳහා ස්ථිර තැපැල් ලිපින ලබාදෙන ලෙස නියෝගයක් නිකුත් කරන්නැයි ඉල්ලා මාවතගම, මුවන් කන්ද වත්ත ප්‍රදේශයේ පදිංචි ජීවරත්නම් සුරේෂ් කුමාර් විසින් ඉදිරිපත් කළ මූලික අයිතිවාසිකම් පෙත්සමක් කැඳවනු ලැබූ අවස්ථාවේදී යි මෙම දැනුම් දීම සිදු කෙරුණේ.
මෙම අවස්ථාවේදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජෙනරාල්වරිය අධිකරණයට දන්වා සිටියේ මෙම පෙත්සම සමථයට පත් කිරීමට ඇති හැකියාව පිළිබඳව කරුණු සොයා බලන බවයි.
ඒ අනුව පෙත්සමෙන් ඉල්ලා තිබෙන ආකාරයට වතුකම්කරුවන්ට තැපැල් ලිපින නිකුත් කිරීමට තිබෙන ඉඩකඩ පිළිබඳව වැවිලි කර්මාන්ත අමාත්‍යංශයේ ලේකම්වරයා කරුණු අධ්‍යයනය කිරීම සිදු කරන බවත් එහි ප්‍රගතිය දැනුම් දීම සඳහා දිනයක් ලබා දෙන ලෙසත් ඉල්ලා සිටියා.
ඒ අනුව අදාළ පෙත්සම සැප්තැම්බර් මස 13 වනදා කැඳවන ලෙස අගවිනිසුරු ජයන්ත ජයසූරිය, මුර්දු ප්‍රනාන්දු සහ මහින්ද සමයවර්ධන යන මහත්ම මහත්මීන් ගෙන සමන්විත ත්‍රිපුද්ගල විනිසුරු මඩුල්ල නියෝග කළා.
පෙත්සමකරු කියා සිටින්නේ දිවයිනේ පිහිටි වතු 277ක් ආශ්‍රිතව වතු කම්කරුවන් හාර ලක්ෂයකට අධික සංඛ්‍යාවක් වාසය කරන බවත් ඔවුන්ට ස්ථිර තැපැල් ලිපින නොමැති වීම නිසා එදිනෙදා කටයුතු කිරීමේදී ඔවුන් දැඩි අපහසුතාවයකට මුහුණ දී සිටින බවයි.
මේ තුළින් ඔවුන්ගේ මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙසත් වතු කම්කරුවන් සඳහා ස්ථිර තැපැල් ලිපින නිකුත් කරන ලෙස වගඋත්තරකරුවන්ට නියෝගයක් නිකුත් කරන මෙන් ද අදාළ පෙත්සමෙන් ඉල්ලා තිබෙනවා.
අදාළ පෙත්සමේ වගඋත්තරකරුවන් ලෙස අග්‍රාමාත්‍යවරයා, වැවිලි කර්මාන්ත අමාත්‍යවරයා, එම අමාත්‍යංශයේ ලේකම් ඇතුළු පිරිසක් නම් කර තිබෙනවා.
