වත්තල ප්‍රදේශයේ හෝටලයක පසුගිය ජූලි 23 වනදා රාත්‍රියේ පැවති උපන්දින සාදයකට කඩාවැදී වෙඩි ප්‍රහාරයක් එල්ලකර පුද්ගලයෙකු ඝාතනය කර ඉන්දියාවට පළා ගොස් සිටි සැකකරුවන් දෙදෙනෙකු මෙරටට පිටුවහල් කර ඒවා තිබෙනවා.
එලෙස පිටුවහල් කළ සැකකරුවන් දෙදෙනා ඊයේ (13) පස්වරුවේ කටුනායක ගුවන්තොටුපොළට පැමිණි පසු අත්අඩංගුවට ගැනීමටයි කටයුතු කර ඇත්තේ.
අදාළ සිද්ධියෙන් පසු ඔවුන් දෙදෙනා බෝට්ටුවක් මගින් ඉන්දියාවට පලාගොස් තිබූ අතර, එහිදී එරට ආරක්ෂක අංශ විසින් අත්අඩංගුවට ගෙන මෙරටට පිටුවහල් කර ඒවා තිබුණා.
වත්තල ප්‍රදේශයේ පදිංචිකරුවන්වන මෙම සැකකරුවන් දෙදෙනා අතරින් එක් අයෙකු 30 හැවිරිදි වියේ පසුවන අයෙකු වන අතර, අනෙක් පුද්ගලයා 34 හැවිරිදි වියේ පසුවන අයෙක්.
ඔවුන් චෙන්නායි නුවර සිට කටුනායක ගුවන්තොටුපොළ වෙත එවා තිබූ අතර, ඒ සම්බන්ධයෙන් ඉන්දීය ආරක්ෂක අංශ කටුනායක ගුවන්තොටුපොළ අපරාධ පරීෂණ දෙපාර්තමේන්තු නිලධාරීන් දැනුවත් කර තිබුණා.
ගුවන්තොටුපොළේ දී අත්අඩංගුවට ගැනුණු මෙම සැකකරුවන් දෙදෙනාගෙන් අපරාධ පරීක්ෂණ දෙපාර්තමේන්තු නිලධාරීන් විසින් ප්‍රකාශ සටහන් කර ගැනීමෙන් පසු, වැඩිදුර විමර්ශන කටයුතු සඳහා බස්නාහිර පළාත් උතුර අපරාධ කොට්ඨාශය වෙත රැගෙන යාමට පියවර ගැනුණා.
