ලෝක බැංකුවේ සභාපති ඩේවිඩ් මල්පාස් සිය ධූරයෙන් ඉල්ලා අස්වන බව නිවේදනය කර තිබෙනවා.
විදෙස් මාධ්‍ය පැවසුවේ ඔහු සිය ධූර කාලය අවසන්වීමට පෙර ධූරයෙන් ඉල්ලා අස්වන බව නිවේදනය කර ඇති බවයි.
ඒ අනුව ඩේවිඩ් මල්පාස් ලබන ජුනි මස 30 වනදා ලෝක බැංකුවේ සභාපති ධූරයෙන් ඉවත්වීමට නියමිතව තිබෙනවා.
ලොව ප්‍රමුඛතම සංවර්ධන ආයතනයේ ප්‍රධානියා ලෙස කටයුතු කිරීමට ලැබීම ගෞරවයක් බවයි සිය ඉල්ලා අස්වීම ප්‍රකාශයට පත් කරමින් ඔහු සඳහන් කළේ.
සංවර්ධන වෙමින් පවතින රටවල් අර්බුධ රැසකට මුහුණ දෙමින් සිටින පසුබිමක් තුළ ලෝක බැංකුව වේගයෙන්, නව්‍යකරණයෙන් යුතුව ප්‍රතිචාර දැක්වීම සම්බන්ධයෙන් තමන් ආඩම්බර වන බව ද ඔහු සඳහන් කළා.
ලොව රටවල් 187 කින් සමන්විත ලෝක බැංකුව, සංවර්ධනය වෙමින් පවතින රටවලට දරිද්‍රතාවය අවම කිරීම වෙනුවෙන් ණය ලබාදීම සිදු කරනවා. ලෝක බැංකුවේ විශාලතම කොටස්කරුවා වන අමෙරිකාව විසින් සම්ප්‍රදායක් ලෙස එහි සභාපතිවරයා තෝරා පත් කරනු ලබනවා.
වත්මන් සභාපති ඩේවිඩ් මල්පාස් එම ධූරයට තෝරා පත් කරනු ලැබුවේ අමෙරිකාවේ හිටපු ජනාධිපති ඩොනල්ඩ් ට්‍රප්ම් විසින්. ඒ 2019 වසරේදීයි.
ලෝක බැංකුවේ සභාපති ලෙස කටයුතු කිරීමේදී ගතවූ වසර කිහිපය තුළ ඩේවිඩ් මල්පාස් හට අභියෝග කිහිපයකටම මුහුණ දීමට සිදුවුණා. කොවිඩ් වසංගතය හා යුක්රේන යුද්ධය ඒ අතරින් ප්‍රමුඛයි.
