පසුගිය වසර තුළ ලෝක ජනගහනය මිලියන 75 කින් වර්ධනය වී ඇති බව බ්‍රහස්පතින්දා එක්සත් ජනපද සංගණන කාර්යාංශය විසින් නිකුත් කරන ලද සංඛ්‍යාලේඛනවලට අනුව අනාවරණ වී තිබෙනවා.
2024 නව වසර එළඹීමත් සමග එය බිලියන 8කට වඩා වැඩි වනු ඇති බවයි සඳහන් වන්නේ.
පසුගිය වසරේ ලෝක ව්‍යාප්ත වර්ධන වේගය 1% ට වඩා අඩු වී තිබුණා. සංගණන කාර්යාංශයේ සංඛ්‍යාලේඛනවලට අනුව 2024 ආරම්භයේදී ලොව පුරා සෑම තත්පරයකටම උපත් 4.3ක් සහ මරණ දෙකක් අපේක්ෂා කෙරෙනවා.
පසුගිය වසරේ එක්සත් ජනපදයේ වර්ධන වේගය 0.53%ක් වූ අතර ලෝක ව්‍යාප්ත අගයෙන් අඩක් පමණ වුණා. එක්සත් ජනපදය මිලියන 1.7ක ජනතාවක් එකතු කර ඇති අතර අලුත් අවුරුදු දිනයේ මිලියන 335.8 ක ජනගහනයක් එහි සිටිනු ඇති.
වත්මන් වේගය දශකයේ අවසානය දක්වා දිගටම පැවතුනහොත්, 2020 දශකය එක්සත් ජනපද ඉතිහාසයේ මන්දගාමීම වර්ධනය වන දශකය විය හැකි බව සඳහන්.
2020 සිට 2030 දක්වා වසර 10ක කාලසීමාව තුළ 4% ට වඩා අඩු වර්ධන වේගයක් ලබා දෙනු ඇති බවයි වාර්තා වන්නේ.
2024 ආරම්භයේදී, එක්සත් ජනපදය සෑම තත්පර නවයකටම එක් උපතක් සහ තත්පර 9.5කට වරක් එක් මරණයක් අත්විඳිනු ඇතැයි අපේක්ෂා කෙරෙනවා. කෙසේ වෙතත්, සංක්‍රමණ ජනගහනය පහත වැටීමෙන් වළක්වනු ඇති බවයි හෙළිවන්නේ.
ශුද්ධ ජාත්‍යන්තර සංක්‍රමණය සෑම තත්පර 28.3කට වරක් එක්සත් ජනපද ජනගහනයට එක් පුද්ගලයෙකු එක් කිරීමට අපේක්ෂිතයි. මෙම උපත්, මරණ සහ ශුද්ධ ජාත්‍යන්තර සංක්‍රමණයේ සංකලනය සෑම තත්පර 24.2කට වරක් එක්සත් ජනපද ජනගහනය එක් පුද්ගලයෙකු විසින් වැඩි කරනු ඇති.
