පසුගිය වසරේ කොල්ලුපිටිය මංසන්දියේ දී රිය අනතුරක් සිදු කිරීමෙන් පසුව නීතිඥවරයෙකුට සහ ඔහුගේ කනිෂ්ඨ නීතිඥවරයාට බැණ මරණ තර්ජනය කළ බවට චෝදනා ගොනු කර තිබූ හිටපු රාජ්ය ඇමැති ලොහාන් රත්වත්තේ එම සිද්ධියෙන් නිදහස් කිරීමට කොටුව මහේස්ත්රාත් නිලුපුලී ලංකාපුර ඊයේ (20) නියෝග කළා.
දසත අධිකරණ වාර්තාකරු පැවසුවේ එම සිද්ධිය සම්බන්ධයෙන් අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කර දැනට ඇප මත මුදා හරින ලද හිටපු රාජ්ය ඇමැති ලොහාන් රත්වත්තේ වෙනුවෙන් නීතිඥවරුන් කළ ඉල්ලීම සලකා බැලූ මහේස්ත්රාත්වරිය මෙලෙස නියෝග කර ඇති බවයි.
සිද්ධිය සම්බන්ධයෙන් අගතියට පත් පාර්ශ්වයට රුපියල් ලක්ෂ 10 ගෙවීම හේතුවෙන් දෙපාර්ශ්වය අතර ඇති වූ එකඟතාව සම්බන්ධයෙන් නීතිඥවරු අධිකරණයට කරුණු දැක්වූවා.
සිද්ධිය සම්බන්ධයෙන් නඩුව කැඳවූ අවස්ථාවේ දී කොල්ලුපිටිය පොලිසිය අධිකරණයට පැමිණිල්ල වෙනුවෙන් කරුණු ඉදිරිපත් කළා.
