ලේ විලක් කළ මාරයෙක් ගැන කියමින් බටලන්දේ වාර්තාව කියැවූ සුනිල් වටගල හඬා වැටෙයි (වීඩියෝ)

1987 බටලන්ද කොමිසම හමුවේ සාක්ෂි ලබාදෙමින් පැවසූ පරිදි ජනතා විමුක්ති පෙරමුණ කිසිදු ප්‍රචණ්ඩකාරී ක්‍රියාවකට සම්බන්ධ නොවුණු බවට කරන ලද හිටපු ජනාධිපති රනිල් වික්‍රමසිංහගේ ප්‍රකාශය සහ ඔහු මෙම වසරේ මුල අල් ජසීරා මාධ්‍යයට පැවසූ පරිදි 1987 සිද්ධියට ජනතා විමුක්ති පෙරමුණ සම්බන්ධ යැයි කියූ ප්‍රකාශය පරස්පර යැයි මහජන ආරක්ෂක නියෝජ්‍ය අමාත්‍ය සුනිල් වටගල මහතා පවසනවා.

1983 ජූලි මස 31 වැනි දින ජනතා විමුක්ති පෙරමුණ සහ ශ්‍රී ලංකා කොමියුනිස්ට් පක්ෂය හා නව සමසමාජ පක්ෂය ප්‍රචණ්ඩකාරී පක්ෂයක් යැයි පවසමින් හිටපු ජනාධිපති ජේ.ආර් ජයවර්ධන එකී පක්ෂ තහනම් කරන ලද බවත්, එහිදී පක්ෂ නායකයෝ සැඟවුණු අතර සෙසු ක්‍රියාධරියන් ව ආණ්ඩුව විසින් අත් අඩංගුවට ගනු ලැබූ බව ද නියෝජ්‍ය අමාත්‍යවරයා සඳහන් කළා.

කෙසේවෙතත් 1983 ඔක්තෝම්බර් 08 වැනි දින රෝහණ විජේවීර සහෝදරයා විසින් ජේ.ආර් ජයවර්ධන මහතාට ලිපියක් යොමු කරමින් පැවසුවේ ජාතිවාදී කෝලාහලවට ජනතා විමුක්ති පෙරමුණ කිසිදු ලෙසකින් සම්බන්ධ නොවන බවත්, ප්‍රජාතන්ත්‍රවාදී දේශපාලනයක් වෙනුවෙන් අවසර දෙන ලෙස ඉල්ලූ බව ද සුනිල් වටගල මහතා කියා සිටියා.

රට ලේ විලක් කිරීමට පැමිණි මාරයෙකු පිළිබඳ ව බටලන්ද කොමිෂන් සභා වාර්තාවේ 27 වැනි පිටුවේ ඇති ප්‍රකාශයක් පාර්ලිමේන්තුවේ දී උපුටා දක්වමින් සුනිල් මහතා සංවේදී ව හඬා වැටෙන අයුරු ද අද (10) දක්නට ලැබුණා.