අද (06) දිනයේ පැවැත්වීමට නියමිතව තිබූ උතුරු මැද පළාතේ එකොළහ ශ්‍රේණිය තුන්වන වාර පරීක්ෂණයේ සිංහල ප්‍රශ්න පත්‍රය විභාගයට පෙර පිටවීම සම්බන්ධයෙන් පොලිසියට පැමිණිල්ලක් සිදුකර තිබෙනවා.
ලංකා ගුරු සේවා සංගමය සහ දෙමව්පියන් විසින් අනුරාධපුර ජ්‍යෙෂ්ඨ පොලිස් අධිකාරීවරයා වෙත මෙම පැමිණිල්ල සිදුකර ඇති බවයි වාර්තා වුණේ.
උතුරු මැද පළාතේ අද (06) පැවැත්වීමට නියමිතව තිබූ එකොළහ ශ්‍රේණිය තුන්වන වාර පරීක්ෂණයේ සිංහල ප්‍රශ්න පත්‍රය ඊයේ (05) දිනයේ සමාජ මාධ්‍ය තුළ හුවමාරු වී ඇති බවට තොරතුරු වාර්තා වුණා.
ඒ, හේතුවෙන් අද දිනයේ පැවැත්වීමට තිබූ එම ප්‍රශ්න පත්‍රය වහාම ක්‍රියාත්මක වන පරිදි අවලංගු කිරීමටයි පළාත් අධ්‍යාපන බලධාරී කටයුතු කළේ.
එම තීරණයත් සමඟ තුන්වන වාර පරීක්ෂණයේ එකොළහ ශ්‍රේණිය සිංහල ප්‍රශ්න පත්‍රය අඩංගු පත්‍ර කට්ටල විවෘත කිරීමකින් තොරව අද (06) පෙරවරු 9.00ට පෙර නැවතත් කොට්ඨාශ අධ්‍යාපන කාර්යාල වෙත ගෙනවිත් භාරදීමට විදුහල්පතිවරුන්ට උපදෙස් තිබුණා.
තාවකාලිකව අත්හිට වූ මෙම ප්‍රශ්න පත්‍ර වෙනුවට වෙනත් ප්‍රශ්නපත්‍රයක් ලබන 20 වනදා ලබාදීමට කටයුතු කරන බවයි උතුරු මැද පළාත් අධ්‍යාපන ලේකම් සිරිමෙවන් ධර්මසේන පැවසුවේ.
