ලාෆ්ස් ගෑස් මිල ගැන දැනුම්දීමක්

ගෘහස්ථ ගෑස් සිලින්ඩරවල මිල ගණන් සංශෝධනය කිරීමට තීරණයක් ගෙන ඇති බව ලාෆ් ගෑස් සමාගම පවසනවා.

නිවේදනයක් නිකුත් කරමින් එම සමාගම කියා සිටියේ සංශෝධිත මිල ගණන් ඉදිරියේදී ප්‍රකාශයට පත් කරන බවයි.

ලිට්‍රෝ ගෑස් සමාගම තම ගෑස් සිලින්ඩරවල මිල ගණන් සංශෝධනය කළද, LAUGFS Gas PLC තම මිල ගණන්වල වෙනසක් සිදු කළේ නැහැ.

මේ අතර, ලිට්‍රෝ ගෑස් සමාගම අද පෙරවරුවේ නිවේදනය කළේ කිලෝග්‍රෑම් 12.5 ගෘහස්ථ ගෑස් සිලින්ඩරයක මිල රුපියල් 300ත් 400ත් අතර අගයකින් පමණ පහළ යනු ඇති බවයි.

රජය විසින් අනුමත කරන ලද මිල සූත්‍රය අනුව මිල අඩු කර ඇති බව ලිට්‍රෝ ගෑස් සමාගමේ සභාපති මුදිත පීරිස් මහතා ප්‍රකාශ කළා.

ලෝක වෙළඳපොලේ ගෑස් මිල පහත වැටීම සහ අමෙරිකානු ඩොලරයට සාපේක්ෂව ශ්‍රී ලංකා රුපියලේ අගය ඉහළ යාම ඇතුළු කරුණු රැසක් මෙම මිල පහත වැටීමට හේතු වූ බව සභාපතිවරයා සඳහන් කර තිබෙනවා.

පසුගිය මස 3වනදා ද ලිට්‍රෝ සමාගම මිල සංශෝධනයේදී ද ගෑස් මිල අඩු කෙරුණා.

එහිදී කිලෝග්‍රෑම් 12.5ක ගෑස් සිලින්ඩරයක මිල රුපියල් 100කින්, කිලෝග්‍රෑම් 5ක ගෑස් සිලින්ඩරයක මිල රුපියල් 40කින් සහ කිලෝග්‍රෑම් 2.3ක ගෑස් සිලින්ඩරයක මිල රුපියල් 19කින් පහළ දැමුණා.

ඒ අනුව කිලෝග්‍රෑම් 12.5ක ලිට්‍රෝ ගෑස් සිලින්ඩරයක මිල රුපියල් 3,638ක්, කිලෝග්‍රෑම් 5ක ගෑස් සිලින්ඩරයක මිල රුපියල් 1,462ක් සහ කිලෝග්‍රෑම් 2.3ක ගෑස් සිලින්ඩරයක මිල රුපියල් 681ක් ලෙසටයි මේ වන විට අලෙවි කෙරෙන්නේ.

මේ අතර සමස්ත ලංකා ආපන ශාලා හිමියන්ගේ සංගමයේ සභාපති අසේල සම්පත් මහතා පැවසුවේ ගෑස් මිල සංශෝධනයේ වාසිය ජනතාවට ලබාදීම සඳහා පාරිභෝගික අධිකාරිය මැදිහත්ව වැඩපිළිවෙලක් සකස් කළ යුතු බවයි.