අතිශය අභියෝගාත්මක කාලවකවානුවක් පසුකර මෙරට බලශක්ති ක්ෂේත්රය විදේශීයයන් මත යැපුණු යුගය අවසන් කර, අපේම රටේ දේශීය ඉංජිනේරුවන්ගේ සහ ශ්රමිකයන්ගේ දායකත්වයෙන් කෙරවලපිටිය ප්රදේශයේ ඉදිවුණු දැවැන්තම සහ කාර්යක්ෂම විදුලි බලාගාරය වන්නේ “සොබාදනවි” බලාගාරයයි.
මෙරට සමස්ත විදුලි ඉල්ලුමෙන් 12%කට ආසන්න ප්රමාණයකට දායකත්වය සපයමින්, 350 MW සන්නද්ධ, චක්රීය (Combined Cycle) ශක්තියෙන් ජාතික විදුලි බල පද්ධතිය සවිබල ගැන්වූ සොබාදනවි බලාගාරයේ මෙම ජාතික ක්රියාන්විතයට දැන් හරියටම වසරක් සපිරෙනවා.
ලංකාවේ බලශක්ති ඉතිහාසය අලුතින් ලියූ ‘සොබාදනවි ‘ බලාගාරයට සාර්ථක වසරක් සපිරෙයි!
අභියෝග රැසක් මැදින් නැගී සිටි 100%ක් ශ්රී ලාංකීය ඉංජිනේරු අභිමානයේ පළමු වසර සැමරුම !
.වියළි කාලගුණයේදී රට අඳුරෙන් මුදාගනිමින්, ජාතික පද්ධතිය සුරක්ෂිත කළ සොඛාදනවී මෙහෙයුම!
මෙරට සමස්ත විදුලි ඉල්ලුමෙන් 12% ක් පමණ සපුරාලමින් බලශක්ති ස්වාධීනත්වයේ පෙරගමන්කරු වෙයි.
කෙරවලපිටිය – සොඛාදනවී ඒකාබද්ධ චක්ර විදුලි බලාගාරය ප්රථම වරට ජාතික විදුලි බල පද්ධතියට සම්බන්ධ කර සාර්ථක වසරක් සපිරීම, ශ්රී ලංකාවේ බලශක්ති ක්ෂේත්රයේ සුවිශේෂී සන්ධිස්ථානයක් ලෙස අද (ජුනි 23) දින සමරනු ලබයි.
මෙම ව්යාපෘතියේ මූලික අඩිතාලම 2016 වසරේදී ටෙන්ඩරයක් කැදවීමත් සමඟ ආරම්භ විය. ඉන්පසු වසර ගණනාවක ප්රමාදයන්, නීතිමය අභියෝග සහ රටේ නූතන ඉතිහාසයේ දරුණුතම ආර්ථික අර්බුදයට මුහුණ දීමට සිදු වුවද, සොඛාදනව් ව්යාපෘතිය නොසැලී ඉදිරියටම ගියේය. අද වන විට එය ශ්රී ලංකාවේ දේශීය ඉංජිනේරු විශිෂ්ටත්වය, තාක්ෂණික ශ්රම බලකායේ නොසැලෙන ජීව ගුණය සහ ඔරොත්තු දීමේ හැකියාව මනාව විදහා දක්වන සැබෑ සංකේතයක් බවට පත්ව තිබේ.
නොසැලී ඉදිරියට ගිය දැක්මක්!
ශ්රී ලංකාවේ විදුලි ඉල්ලුම සැපයුමට වඩා වේගයෙන් වර්ධනය වෙමින් පැවති වටපිටාවක සහ බස්නාහිර පළාත තුළ ඉහළ කාර්යක්ෂමතාවයකින් යුත්, නම්යශීලී විදුලි උත්පාදන මධ්යස්ථානයක අවශ්යතාවය මෙරට ජනන සැලැස්මේ දැක්වුණු අතර මෙම ව්යාපෘතියේ මූලික ඇරඹුම එතැනය.
මේ සඳහා වන ටෙන්ඩරය 2016 වසරේදී නිකුත් කරන ලද අතර, එල්.ටී.එල්. හෝල්ඩිංග්ස් (LTL Holdings) හි අනුබද්ධ සමාගමක් වන ලක්දනව් (Lakdanavi Limited) ආයතනය, රටේ විශාලතම සහ තාක්ෂණික වශයෙන් දියුණුම තාප විදුලි බලාගාරය සැලසුම් කිරීම, ඉදිකිරීම සහ ක්රියාත්මක කිරීමේ කොන්ත්රාත්තුව හිමිකර ගත්තේය.
කෙසේ වෙතත්, ව්යාපෘතිය සැලසුම් කිරීමේ සිට ක්රියාත්මක කිරීම දක්වා වූ ගමන කිසිසේත්ම සුමට එකක් නොවීය. නීතිමය අභියෝග, විවිධ පාර්ශවකරුවන්ගේ පරිපාලනමය ප්රමාදයන් සහ ප්රතිපත්තිමය ප්රමුඛතාවල වෙනස්වීම් හේතුවෙන් ව්යාපෘතිය වසර ගණනාවකින් පසුපසට ගියේය.
ඉන්පසුව 2021 වසර උදා වූ අතර, එය ශ්රී ලංකාව දැඩි ලෙස පරීක්ෂාවට ලක් කළ වසරක් විය. ශ්රී ලංකාව එහි ඉතිහාසයේ දරුණුතම ආර්ථික අර්බුදයට මුහුණ දීම ඇරඹි අතර විදේශ විනිමය සංචිත සිඳී ගියේය. විදෙස් ආයෝජකයින් රටින් ඉවත් විය. රට පුරා ඉදිකිරීම් ව්යාපෘති ඇතහිටි අතර සැපයුම් දාමයන් බිඳ වැටුණි. එසේ වුවද, සෑම අපේක්ෂාවකටම අභියෝග කරමින් සොබාදනවී හි වැඩකටයුතු කිසිවිටෙකත් නතර නොවීය.
එයට හේතුව සරල නමුත් අතිශයින් කැපී පෙනෙන සුළුය. සැලසුම් කිරීමේ සහ ඉංජිනේරු කටයුතු වල සිට ඉදිකිරීම් අධීක්ෂණය සහ ක්රියාත්මක කිරීම දක්වා වූ මෙම ව්යාපෘතියේ සෑම අංශයක්ම සිදු කරන ලද්දේ ශ්රී ලාංකික ඉංජිනේරුවන් සහ තාක්ෂණික වෘත්තිකයන් විසිනි. විදේශීය විශේෂඥතාව මත යැපීමක් එහි නොවීය. වැඩබිම අතහැර යාමට දේශීය කොන්ත්රාත්කරුවන් හෝ ආපසු මෙරටට කැඳවීමට විදේශීය තාක්ෂණික කණ්ඩායම් එහි සිටියේ නැත. ව්යාපෘතියේ සම්පූර්ණ දේශීය අනන්යතාවය හේතුවෙන්, ආර්ථික අර්බුදයෙන් රටම අඩපණ වූ පසුබිමේ පවා කැප වූ දේශීය ශ්රම බලකාය රට වෙනුවෙන් ව්යාපෘතිය නිම කිරීමේ අදිටනින් යුතුව ඉදිරියටම ගියේය.
ක්රියාත්මක කිරීම සහ පද්ධතියට සම්බන්ධ කිරීම!
2024 අගෝස්තු 28 වන දින, එවකට ජනාධිපති රනිල් වික්රමසිංහ මහතාගේ ප්රධානත්වයෙන් සොඛාදනව් විදුලි බලාගාරයේ පළමු අදියර සමාරම්භ කරන ලදී. එය ශ්රී ලංකාවේ ප්රථම වරට භාවිතයට ගැනුණු, අතිත වන සීමෙන්ස් එනර්ජි (Siemens Energy) F-Class ගෑස් ටර්බයිනයකින් ක්රියාත්මක වන මෙගාවොට් 220 ක විවෘත චක්ර ගෑස් ටර්බයින් ඒකකයකි. මෙම අදියර පමණක් වුවද රටේ පවතින ඕනෑම තාප විදුලි බලාගාරයක කාර්යක්ෂමතාව අභිබවා යමින්, රටේ විදුලි උත්පාදන තාක්ෂණයේ දැවැත්ත පිළිමක් සහිටුහන් කළේය.
එහි දෙවන අදියර – එනම් මෙගාවොට් 130 ක අපතේ යන තාපය ප්රතිසාධනය කරන වාෂ්ප උත්පාදකය (HRSG) සහ වාෂ්ප ටර්බයිනයෙන් සමන්විත ඒකාබද්ධ චක්ර වින්යාසය – 2025 සැප්තැම්බර් 17 වන දින අග්රාමාත්ය ආචාර්ය හරිනි අමරසූරිය මහත්මියගේ ප්රධානත්වයෙන් ජාතික විදුලි බල පද්ධතියට සාර්ථකව සම්බන්ධ කරන ලදී. මේ වන විට අදියර දෙකම සම්පූර්ණයෙන්ම ක්රියාත්මක වන අතර, සොඛාදනව් බලාගාරය එහි උපරිම ධාරිතාවය වන මෙගාවොට් 350 ක විදුලියක් පද්ධතියට මුදාහරින අතර, එය ශ්රී ලංකාවේ විශාලතම සහ කාර්යක්ෂමතම විදුලි බලාගාරය බවට පත්ව ඇත.
වඩාත්ම අවශ්ය වූ මොහොතේ රට බලගැන්වීම!
විදුලි බලාගාරයක සැබෑ වටිනාකම මැනිය හැක්කේ කඩදාසි මත සඳහන් එහි ධාරිතාවයෙන් නොව, පීඩනය හමුවේ එය දක්වන කාර්යසාධනයෙහි. සොඛාදනවී බලාගාරය ප්රථම වරට ක්රියාත්මක කර මාස කිහිපයක් ඇතුළත එම පරීක්ෂණයෙන් ඉහළින්ම සමත් විය.
2026 මාර්තු සහ අප්රේල් යන වියළි කාලගුණික මාසවලදී, ශ්රී ලංකාවේ ජල විදුලි බලාගාර ආශ්රිත ජලාශ වල ජල මට්ටම දැඩි ලෙස පහත වැටුණි. පුනර්ජනනීය බල ශක්ති පද්ධතියේ කොඳු නාරටිය වන ජල විදුලි බලාගාරවල උත්පාදනය සීමා විය. සාම්ප්රදායිකව, මෙවැනි කාල පරිච්ඡේද වලදී නිවාස, රෝහල්, පාසල් සහ කර්මාන්ත ශාලා වලට බාධා පමුණුවමින් විදුලි කප්පාදු සිදු වුවද, සොබාදනව් බලාගාරය මේ අවස්ථාවේ එම අඩුව පිරවීමට ඉදිරිපත් විය.
බලාගාරයේ ඇති නම්යශීලී සහ වේගවත් ප්රතිචාර දැක්වීමේ හැකියාව නිසා, ඉතා කෙටි දැනුම්දීමකින් එහි උපරිම ධාරිතාව දක්වා ජනන යන්ත්ර ක්රියාකොට, ජාතික පද්ධතියට වඩාත්ම අවශ්ය මොහොතේදී විදුලිය සැපයීමට හැකි විය. මෙහි සෘජු ප්රතිඵලයක් ලෙස, වියළි කාලය පුරාම පැය 24 පුරාම අඛණ්ඩ විදුලි සැපයුමක් පවත්වා ගැනීමට ශ්රී ලංකාවට හැකි වූ අතර, සොබාදනව් බලාගාරය නොතිබුනේ නම් මෙය කිසිසේත් ඉටු කරගත නොහැකි වන්නකි. දීර්ඝ විදුලි කප්පාදුවක් හේතුවෙන් සිදු විය හැකිව තිබූ ආර්ථික හානි, එනම් නිෂ්පාදන මාර්ග ඇතගිටීම, සැපයුම් දාම බිඳවැටීම සහ ආයෝජක විශ්වාසය පළුදු වීම, මඟ හරවා ගැනීමට මෙයින් හැකි විය. එමඟින් තවමත් බිඳෙන සුළු මට්ටමක පවතින ශ්රී ලංකාවේ ආර්ථික පුනර්ජීවනය ආරක්ෂා විය.
ඉංජිනේරු විශිෂ්ටත්වය: ශ්රී ලාංකිකයන්ගෙන් ශ්රී ලංකාවට!
සොඛාදනව් හි ඇති සුවිශේෂීම අංගය එහි මෙගාවොට් ප්රමාණය නොව, එය සාක්ෂාත් කරගත් ක්රම වේදයයි. ශ්රී ලංකාවේ මහා පරිමාණ යටිතල පහසුකම් ව්යාපෘති නිරන්තරයෙන්ම විදේශීය ඉංජිනේරු සමාගම්, ආනයනික විශේෂඥතාව සහ විදේශීය ව්යාපෘති කළමනාකරණ කණ්ඩායම් මත යැපීම වෙනුවට, සොබාදනව් සම්පුර්ණයෙන්ම වෙනස් මඟක් ගත්තේය.
ව්යාපෘති සංවර්ධක සහ ක්රියාකරු වන ලක්දනවී ලිමිටඩ් (Lakdhanavi Limited) හි නායකත්වය යටතේ, මෙම ව්යාපෘතිය සම්පූර්ණයෙන්ම සැලසුම් කිරීම, ඉංජිනේරු කටයුතු සිදු කිරීම සහ ක්රියාත්මක කිරීම කරන ලද්දේ ශ්රී ලාංකික වෘත්තිකයන් විසිනි. ප්රධාන ඉංජිනේරු කටයුතු සඳහා කිසිදු දේශීය තාක්ෂණික උපදේශන ආයතනයක සහාය ලබා නොගන්නා ලදී. ජාත්යන්තර ප්රමිතියට ගැලපෙන මට්ටමේ යටිතල පහසුකම් ස්වාධීනව සංවර්ධනය කිරීමට අවශ්ය බුද්ධිමය මෙන්ම තාක්ෂණික හැකියාව ශ්රී ලංකාව සතු බවට වූ සාක්ෂියක් ලෙස බල ශක්ති ක්ෂේත්රයේ ප්රවීණයන් විසින් මෙම ජයග්රහණය බෙහෙවින් අගය කරනු ලැබ ඇත.
2025 සැප්තැම්බර් මාසයේ පැවැති පූර්ණ විවෘත කිරීමේ උත්සවයේදී සොඛාදනව් බලාගාරය “දේශීය ඉංජිනේරු දක්ෂතාවල ගැඹුර විදහා දක්වන සාක්ෂියක් සහ අනාගත බල ශක්ති යටිතල පහසුකම් ව්යාපෘති සඳහා ආදර්ශයක් බවට ඇගයීමට භාජනය වූයේ ඒ අනුවය.
තාක්ෂණික පිරිවිතරයන් සහ හැකියාවන්!
සොඛාදනව් ඒකාබද්ධ චක්ර විදුලි බලාගාරය සැලසුම් කර ඇත්තේ ඉහළ කාර්ය සාධනයක් මෙන්ම නම්යශීලී බවක්ද සහිතවය.
Siemens Energy F-Class ගෑස් ටර්බයිනය: ලෝකයේ ඇති දියුණුම ගෑස් ටර්බයින වලින් එකක් වන මෙය, ඉහළ තාප කාර්යක්ෂමතාවයක් සහ වේගයෙන් ක්රියාත්මක වීමේ හැකියාවක් සහිතය.
ද්විත්ව ඉන්ධන භාවිතය (Dual-Fuel Readiness): වත්මන් විහාසය තුළ, බලාගාරය ඩීසල් ඉන්ධන මගින්
ක්රියාත්මක වන නමුත්, ශක්ය සැපයුම් දාමයක් ස්ථාපිත වූ පසු ද්රවීකෘත ස්වභාවික වායු (LNG) වෙතබාධාවකින් තොරව මාරුවීමේ යටිතල පහසුකම් සතුය. LNG සැපයුම් ගිවිසුම් නිල වශයෙන් අවසන් වූ පසු, සොඛාදනවී බලාගාරය සැලකිය යුතු ලෙස පිරිවැය අඩු සහ පරිසර හිතකාමී වනු ඇත.
ඒකාබද්ධ චක්ර තාක්ෂණය: ඒකාබද්ධ චක්ර මාදිලියේදී (Combined-Cycle Mode), ගෑස් ටර්බයිනයෙන් පිටවන අතිරික්ත තාපය HRSG හරහා ප්රතිසාධනය කර වාෂ්ප ටර්බයිනය මගින් අතිරේක විදුලිය නිපදවනු ලබයි. එමගින් සාමාන්ය විවෘත චක්ර තාප උත්පාදනයට වඩා සමස්ත කාර්යක්ෂමතාවය කැපී පෙනෙන ලෙස ඉහළ යයි.
ක්ෂණික ප්රතිචාර දැක්වීම: උපදෙස් ලැබී මිනිත්තු කිහිපයක් ඇතුළත සොඛාදනවී බලාගාරය සක්රිය කර ජාතික පද්ධතියට සම්බන්ධ කළ හැකිය. ජාතික පද්ධතිය තුළ වෙනස්වන සුළු පුනර්ජනනීය බල ශක්ති ප්රමාණය (සූර්ය සහ සුළං) කළමනාකරණය කරන පද්ධති ක්රියාකරුවන්ට මෙම වේගවත් ප්රතිචාර දැක්වීමේ හැකියාව අගනා මෙවලමකි.
හයිඩ්රජන් සූදානම (Future-Proofed): මෙහි ඇති F-Class ටර්බයිනය 30% දක්වා හයිඩ්රජන් ඉන්ධන
මිශ්රණයක් සමග ද ක්රියාත්මක විය හැකි බැවින්, ෆොසිල ඉන්ධන වලින් බැහැර වන ගෝලීය සංක්රාන්තියට ඔරොත්තු දෙන පරිදි සොබාදනවී බලාගාරය අනාගතයට ගැළපෙන ලෙස සකස් කර ඇත. හරිත හයිඩ්රජන් නිෂ්පාදනය වාණිජමය වශයෙන් ලාභදායී වන විට, අධික වියදම් සහිත නවීකරණයන්ගෙන් තොරව බලාගාරයේ කාබන් විමෝචනය ක්රමයෙන් අඩු කරගත හැකිය.
ජාතික දායකත්වය: සමස්ත ස්ථාපිත ධාරිතාව මෙගාවොට් 350ක් වන සොබාදනවී බලාගාරය, දැනට ශ්රී ලංකාවේ සමස්ත විදුලි ඉල්ලුමෙන් 12%ක් පමණ සපුරාලන අතර, එය පෞද්ගලික අයිතිය යටතේ පවතින විදුලි බලාගාර අතුරින් ජාතික පද්ධතියට විශාලතම දායකත්වය සපයන බලාගාරයයි.
ශ්රී ලංකාවේ බල ශක්ති අනාගතයේ මූලික පදනම !
2030 වන විට ශ්රී ලංකාව සිය විදුලි බලයෙන් 70%ක් පුනර්ජනනීය බලශක්ති ප්රභවයන්ගෙන් උත්පාදනය කිරීමට සහ 2050 වන විට ශුන්ය කාබන් විමෝචනය (Net-Zero) සාක්ෂාත් කර ගැනීමට කැපවී සිටියි. සොඛාදනව් බලාගාරය මෙම සංක්රාන්තිය අඩාල නොකර, එය සක්රීය කිරීමට උපාය මාර්ගික කාර්යභාරයක් ඉටු කරයි.
රට සූර්ය සහ සුළං බලශක්ති ධාරිතාව ඉහළ නංවන විට, පද්ධතියේ ස්ථාවරත්වය ප්රධානතම ගැටලුවක් බවට පත් වේ. වරින් වර වෙනස් වන පුනර්ජනනීය බල ශක්තිය සඳහා ස්ථිර උපස්ථ උත්පාදනයක් (Firm Backup Generation) අවශ්ය වෙයි. එනම් සූර්යාලෝකය නොමැති විට සහ සුළං තත්ත්වය දුර්වල විට ක්ෂණිකව ක්රියාත්මක කළ හැකි බල ශක්තියයි. සොබාදනව් බලාගාරය, එහි වේගවත් ආරම්භක සහ ඉහළ ධාරිතා හැකියාව සමඟින් එම උපස්ථය මනාව සපයන අතර, එමඟින් පුනර්ජනනීය බල ශක්ති සංක්රාන්තිය විශ්වාසයෙන් යුතුව ඉදිරියට ගෙනයාමට මඟ පාදයි.
එදා සොඛාදනවී බලාගාරය විවෘත කිරීමේ උත්සවයේදී අදහස් දැක්වූ අග්රාමාත්ය ආචාර්ය හරිති අමරසූරිය මහත්මිය ගේ අදහස් මෙහිදී සිහිපත් කිරීම වැදගත්ය. “අපට මෙම දරුණු ආර්ථික අර්බුදයෙන් ගොඩ ඒමට ඇති ප්රධානතම බාධාවක් වන්නේ දරාගත නොහැකි බලශක්ති පිරිවැයයි. අපගේ ඉලක්කය වන්නේ ශ්රී ලංකාව කලාපයේ අඩුම විදුලි මිලක් ඇති රට බවට පත් කිරීමයි. අපේම දේශීය ඉංජිනේරු කෞශල්ය උපයෝගී කරගෙන ඉදිකරන ලද සොඛාදනවී වැනි ව්යාපෘති ඒ සඳහා ප්රධානතම මෙවලමක් වෙනවා.
අනාගතය දෙස බැලීම!
සොඛාදනව් බලාගාරය ජාතික පද්ධතියට සම්බන්ධ කර වසරක් සපිරෙන මෙම අවස්ථාවේදී, අවධානය යොමුව ඇත්තේ එහි මීළග පරිච්ඡේදය වෙතයි. දැනට සිදුවෙමින් පවතින LNG සැපයුම්කරුවන් සමඟ වන සාකච්ඡා සාර්ථක වීමෙන් පසුව, විදුලි උත්පාදන පිරිවැය සැලකිය යුතු ලෙස අඩු කිරීමට සහ බලාගාරයේ පාරිසරික බලපෑම අවම කිරීමට හැකි ඉන්ධන සංක්රාන්තිය සිදුවනු ඇතැයි අපේක්ෂා කෙරේ. සුර්ය, සුළං සහ බැටරි බල ශක්ති ගබඩා කිරීමේ සමාන්තර ආයෝජන, සොබාදනවී හි නම්යශීලී උත්පාදනය සමඟ එක්ව වඩාත් කාර්යක්ෂම හා ඔරොත්තු දෙන ජාතික විදුලි බල පද්ධතියක් නිර්මාණය කරනු ඇත.
එසේම වඩාත්ම අහිතකර තත්ත්වයන් යටතේ වුවද, දේශීයව මෙහෙයවන සහ ක්රියාත්මක වන ව්යාපෘති ජාතික අවශ්යතාවලට ගැළපෙන පරිදි නිම කළ හැකි බව සොඛාදනව් බලාගාරය ඔප්පු කර ඇත. එය අනාගත බලශක්ති යටිතල පහසුකම් සංවර්ධනය සඳහා කදිම ආදර්ශයක් වන අතර, ශ්රී ලංකාවේ ඉංජිනේරුවන්ට ක්ෂේත්රයේ වඩාත්ම සංකීර්ණ අභියෝගයන්ට සාර්ථකව මුහුණ දිය හැකි බවටද කදිම සාක්ෂියකි.
