2026 වසරේ මුල් භාගයේදී ඉන්දීය පාලනය යටතේ පවතින කාශ්මීර කලාපයේ සිදුවූ දරුණු ත්‍රස්ත ප්‍රහාරයකට සෘජුවම වගකිවයුතු බවට චෝදනා කරමින්, ලෂ්කාර්-ඊ-තොයිබා (Lashkar-e-Taiba – LeT) ත්‍රස්ත කල්ලිවල නිර්මාතෘ හෆීස් සයීඩ්ට එරෙහිව ඉන්දියාවේ ප්‍රධානතම විරෝධී ත්‍රස්ත විමර්ශන ආයතනය වන ජාතික විමර්ශන ඒජන්සිය විසින් නිල වශයෙන් චෝදනා පත්‍ර ගොනු කර තිබෙනවා.
ඉන්දීය ආරක්ෂක අංශ මුලස්ථානයක් ඉලක්ක කර ගනිමින් එල්ල වූ මෙම ප්‍රහාරයෙන් ඉන්දීය සන්නද්ධ බලකා සාමාජිකයන් ඇතුළු කිහිපදෙනෙකු ජීවිතක්ෂයට පත් වූ අතර, එහි මහමොළකරු ලෙස ක්‍රියා කර ඇත්තේ දැනට පාකිස්ථානයේ රැඳී සිටින හෆීස් සයීඩ් බව NIA ආයතනය අවධාරණය කරනවා.
ඉන්දීය විමර්ශන නිලධාරීන් පෙන්වා දෙන්නේ පාකිස්ථාන ඔත්තු සේවා අංශවල (ISI) රහසිගත සහයෝගය ඇතිව මෙම ප්‍රහාරය සැලසුම් කර ඇති බවට ප්‍රමාණවත් සාක්ෂි තමන් සතු බවයි.
ජාත්‍යන්තරව තහනමට ලක්වූ ත්‍රස්තවාදියෙකු වන හෆීස් සයීඩ්, 2008 වසරේදී ඉන්දියාවේ මුම්බායි නුවරට එල්ල වූ දරුණු ත්‍රස්ත ප්‍රහාරයේ ද ප්‍රධාන සැලසුම්කරුවෙකු වනවා.
ඔහු අත්අඩංගුවට ගැනීම සඳහා තොරතුරු සපයන්නෙකුට ඇමරිකානු ඩොලර් මිලියන 10ක ත්‍යාග මුදලක් ද ප්‍රකාශයට පත් කර ඇතත්, ඔහු තවමත් පාකිස්ථානය තුළ නිදහසේ ආරක්ෂිතව පසුවීම සම්බන්ධයෙන් නවදිල්ලි පාලනය දීර්ඝ කාලයක සිට ඉස්ලාමාබාද් පාලනයට සිය දැඩි විරෝධය පළ කරමින් සිටිනවා.
මෙම නවතම ප්‍රහාරයට අදාළව හෆීස් සයීඩ් ඇතුළු තවත් සැකකරුවන් කිහිපදෙනෙක්ට එරෙහිව ඉන්දියාවේ දැඩි ත්‍රස්ත විරෝධී පනතක් වන ‘නීතිවිරෝධී ක්‍රියාකාරකම් වැළැක්වීමේ පනත’ යටතේ නඩු පවරා ඇති අතර, සැකකරුවන් ඉන්දියාවට භාර දෙන ලෙස පාකිස්ථාන රජයෙන් නිල වශයෙන් ඉල්ලා සිටීමට ද නවදිල්ලි බලධාරීන් සූදානම් වනවා.
කෙසේ වෙතත්, මෙම චෝදනා පාකිස්ථාන විදේශ අමාත්‍යාංශය විසින් ප්‍රතික්ෂේප කර ඇති අතර, ඔවුන් පවසන්නේ ඉන්දියාව පදනම් විරහිත චෝදනා එල්ල කරමින් කලාපීය ස්ථාවරත්වය අනතුරේ හෙළන බවයි.
