ශ්රී ලංකාවේ වනජීවී සහ වෘක්ෂලතා ආඥා පනත, සත්ව රෝග පනත සහ රේගු ආඥා පනත උල්ලංඝනය කරමින් තායිලන්තයේ සිට නීතිවිරෝධී ලෙස මෙරටට ගෙන ආ රුපියල් ලක්ෂ හතලිහක් පමණ වටිනා ජීවී සතුන් 88 දෙනෙකු සමඟ යුවළක් අත්අඩංගුවට අත්අඩංගුවට ගෙන තිබෙනවා.
අදාළ සැකකාර යුවළ ඊයේ (25) පස්වරුවේ කටුනායක ගුවන් තොටුපොළ පැමිණීමේ පර්යන්තයේ දී රේගු නිලධාරීන් විසින් අත්අඩංගුවට ගෙන ඇති බවයි වාර්තා වුණේ.
මෙලෙස අත්අඩංගුවට ගෙන ඇත්තේ අවිස්සාවේල්ල, පුවක්පිටිය ප්රදේශයේ පදිංචි 35 හැවිරිදි වියේ පමණ පසුවන තරුණ යුවළක්.
මොවුන් දෙදෙනා ඊයේ (25) පස්වරු 04.35ට තායිලන්තයේ බැංකොක් නුවර සිට ශ්රී ලන්කන් ගුවන් සේවයේ යූ.එල් – 405 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
මෙම යුවළගේ ගමන් මලු තුළ වාතාස්රය ලැබෙන පරිදි සකස් කළ කුඩා ප්ලාස්ටික් පෙට්ටි තුළ දමාගෙන ඉබ්බන් , ගෙම්බන්, මාලු, ඉත්තෑවන්, ලේනුන්, කැස්බෑවන්, කටුස්සන්, හැම්ස්ටර්, මීයන්, සැලමැන්ඩා සහ තවත් පණුවන් විශේෂයක් රැගෙනවිත් තිබුණා.
මෙම ජීවී සතුන් තොගය තායිලන්තයේ බැංකොක් නුවර ගුවන් තොටුපොළ ආරක්ෂක නිලධාරීන්ට හෝ රේගු නිලධාරීන්ගේ නිරීක්ෂණයට ලක් නොවීම ගැටළුවක් බවයි කටුනායක ගුවන් තොටුපොළ රේගු නිලධාරීන් සඳහන් කළේ.
මෙම යුවළ රේගු නිලධාරීන් භාරයේ තබාගෙන මේ පිළිබඳ වැඩිදුර විමර්ශන කටයුතු ආරම්භ කර ඇති බවයි වාර්තා වුණේ.
සොයාගත් සතුන් එම විමර්ශන කටයුතු නිමවන තෙක් කටුනායක ගුවන් තොටුපොළ සත්ව නීරෝධායන ආයතනය වෙත භාරදීමට පියවර ගෙන තිබෙනවා.
