මහනුවර – පේරාදෙණිය මාර්ගයේ පිහිටි මැණික් හා ස්වර්ණාභරණ වෙළෙඳසැලකට ඊයේ (20) පැමිණි පිරිසක් එහි තිබූ රුපියල් ලක්ෂ 80ක් පමණ වටිනා නිල් මැණිකක් සොරාගත් බව කියන සිද්ධියක් සම්බන්ධයෙන් මහනුවර පොලීසිය පරීක්ෂණ ආරම්භකර තිබෙනවා.
සොරාගත් නිල් මැණිකේ පෙනුමට සමාන ලෙස නිල් මැණිකක් ලෙස වර්ණ ගැන් වූ වීදුරු ගලක් රැගෙන පැමිණ ඇති එම පුද්ගලයින් ඉතා සූක්ෂම ලෙස එම ගල මාරුකර නිල් මැණික සොරාගෙන ගොස් ඇති බවයි වාර්තා වන්නේ.
පැමිණි පිරිස නිල් මැණික පරීක්ෂාකර අනතුරුව එය මිලට ගැනීමට යළි පැමිණෙන බව දන්වමින් පිටව ගොස් ඇති අතර, ඔවුන් පිටවගොස් පැය කිහිපකට පසු වෙළෙඳසැල්හිමියාට පැමිණි පිරිස සම්බන්ධයෙන් සැකයක් මතුව තිබෙනවා.
එහිදී වෙළෙඳසැල්හිමියා මැණික පරීක්ෂා කිරීමේ දී එය ව්‍යාජ මැණිකක් බවට හඳුනාගෙන ඒ සම්බන්ධයෙන් පොලිසියට පැමිණිල්ලක් සිදුකර ඇති බව සඳහන්.
පැමිණි පුද්ගලයින් තිදෙනා අතරින් එක් අයෙකු ගැණුම්කරු ලෙසත් අනෙක් දෙදෙනා බ්‍රෝකර්වරුන් ලෙස ලෙසත් පෙනී සිට ඇති බවයි වාර්තා වුණේ.
ආරක්ෂිත කැමරා දර්ශන ඔස්සේ සැකකරුවන් පිළිබදව හා ඔවුන් පැමිණි වාහනය සම්බන්ධව තොරතුරු අනාවරණය කරගෙන තිබෙනවා.
සැකකරුවන් අත්අඩංගුවට ගැනීමට මහනුවර පොලිස් ස්ථානය විමර්ශන සිදුකරනු ලබනවා.
