දොළොස්බාගේ සිට නාවලපිටිය දක්වා ධාවනය වූ ලංගම බස් රථයක් උඩුවැල්ල ප්‍රදේශයේ දී මාර්ගය අසල පිහිටි කන්දක ගැටීමෙන් අද (09) පෙරවරුවේ අනතුරක් සිදුව තිබෙනවා.
මෙම අනතුරෙන් බස් රථයේ ගමන් ගත් පාසල් ළමුන් තිදෙනෙක් ඇතුළු 09 දෙනෙක් තුවාල ලබා ඇති බවයි වාර්තා වුණේ.
තුවාල ලැබූවන් අතර බස් රථයේ රියදුරු ද සිටිනවා.
නාවලපිටිය ලංගම ඩිපෝවට අයත් බස් රථය ධාවනය වෙමින් තිබූ අවස්ථාවේ දී බස් රථයේ ඉදිරිපසින් විශාල ශබ්දයක් ඇසී ඇති බවත්, ඒ සමඟ බස් රථය රියදුරුගේ පාලනයෙන් මිදී ගොස් තිබෙනවා.
එම අවස්ථාවේ දී රියදුරා දැඩි පරිශ්‍රමයක් දරා බස් රථය මාර්ගය අසල පිහිටි කන්දක ගැටීමට සලස්සවා නතර කරගෙන ඇති බවයි අප වාර්තාකරු සඳහන් කළේ.
බස් රථය අනතුරට පත් වූ ස්ථානයේ සිට මිටර් 300ක පමණ දුරකින් අධික බෑවුමක් සහිත ප්‍රපාතයක් පිහිටා ඇති බවත්, රියදුරා බස් රථය ප්‍රපාතයට පෙරළීම වළක්වා ගනිමින් සිදුවීමට ගිය විශාල අනතුරක් වළක්වාගෙන ඇති බවයි පොලිසිය පැවසුවේ.
අනතුර සිදුවන අවස්ථාවේ බස් රථය තුළ පාසල් ළමුන් ඇතුළු මගීන් 50 දෙනෙකු පමණ සිට ඇති බවයි තොරතුරු වාර්තා වුණේ.
