රෝහිත් ඉවත්කිරීමේ තීරණයෙන් පසු ප්‍රේක්ෂකයින්ගෙන් මුම්බායි පිළට දැඩි බලපෑම්

මුම්බායි ඉන්දියන්ස් කණ්ඩායමේ නායකත්වයේ වෙනස් සිදුකරමින් රෝහිත් ශර්මා එම තනතුරෙන් ඉවත් කිරීමට එහි කළමනාකාරිත්වය කටයුතු කළා.

ඒ, අනුව මුම්බායි කණ්ඩායමේ නායකත්වයට හර්දික් පාණ්ඩ්‍යා පත් කිරීමයි ඊයේ (15) කටයුතු කළේ.

මුම්බායි ඉන්දියන්ස් හිමිකාරිත්වය ගනු ලැබූ මෙම තීරණාත්මක තීරණය සම්බන්ධයෙන් මුම්බායි ප්‍රේක්ෂකයින් බහුතරයක් දැඩි අප්‍රසාදය පළකර ඇති බවයි ඉන්දීය මාධ්‍ය වාර්තා කරන්නේ.

ඇතැම් මුම්බායි ප්‍රේක්ෂකයින් මුම්බායි ඉන්දියන්ස් කමිස සහ ධජ පුළුස්සා දමමින් සිය විරෝධත්වය පළකරන ආකාරය එරට මාධ්‍ය වාර්තාකර තිබුණා.

පසුගිය තරගාවලි දෙක තුළ දී ගුජරාට් ටයිටන්ස් කණ්ඩායමේ නායකත්වය දැරූ හර්දික් පාණ්ඩ්‍යා 2024 අයි.පී.එල්. තරගාවලිය වෙනුවෙන් මුම්බායි ඉන්දියන්ස් කණ්ඩායමට එක්කර ගත්තේ ගුජරාට් ටයිටන්ස් සමඟ සිදුකළ ඉහළපෙළේ වෙළඳ ගනුදෙනුවකින් පසුවයි.

එම වෙළඳ ගනුදෙනුවෙන් පසුව ඇතැම් විචාරකයින් මත පළකර සිටියේ මුම්බායි ඉන්දියන්ස් නයකත්වයේ ද වෙනසක් සිදුවීමට නියමිත බවයි.

විචාරකයින්ගේ එම මතයන් සනාථ කරමින් මුම්බායි ඉන්දියන්ස් කණ්ඩායම සිය නායකත්වයේ වෙනස් කිරීමේ තීරණය ඊයේ (15) නිවේදනය කළා.

මේ අතර නායකත්වයෙන් රෝහිත් ඉවත් කිරීමේ තීරණය ප්‍රකාශයට පත් කිරීමත් සමඟ මුම්බායි ඉන්දියන්ස් සමාජ මාධ්‍ය ජාලවලට ද ඉන් දැඩි බලපෑමක් එල්ල වී ඇති බව සඳහන්.

එහි ප්‍රතිඵලයක් ලෙස මුම්බායි ඉන්දියන්ස් ඉන්ස්ටර්ග්‍රෑම් ගිණුමෙන් ලක්ෂ දෙකකට ආසන්න අනුගාමිකයින් පිරිසක් මේ වන විටත් ඉවත්ව ඇති බවයි වාර්තා වන්නේ.