රේගුව හා සම්බන්ධ තොරතුරු භාවිත කරමින් ජනතාව රවටා සිදුකරන මූල්‍ය වංචාවල වර්ධනයන් දක්නට ලැබෙන බව ශ්‍රී ලංකා රේගුව පවසනවා.
රේගු මාධ්‍ය ප්‍රකාශක අතිරේක රේගු අධ්‍යක්ෂ ජනරාල් සුදත්ත සිල්වා මහතා කියාසිටියේ රේගුවේ ලිපි ශීර්ෂ, දුරකථන අංක පමණක් නොව රේගු නිලධාරීන්ගේ නම් යොදා ගනිමින් මෙම වංචනික කටයුතු සිදු වන බවයි .
මෙවැනි වංචා සම්බන්ධයෙන් දිනකට දුරකථන ඇමතුම් විශාල ප්‍රමාණයක් ලැබෙන බව මාධ්‍ය ප්‍රකාශකවරයා සඳහන් කළා.
විදේශයකින් වටිනා භාණ්ඩ ඇතුලත් පාර්සලයක් ලැබී ඇති බව පැවසීම, එම පාර්සලයේ විදේශ මුදල් විශාල ප්‍රමාණයක් ඇති බවට පැවසීම, මෝටර් රථයක ්ජයග්‍රහණය කර ඇති බවට පැවසීම මෙන්ම ආදරවන්තයෙක් හෝ ආදරවන්තියක් ත්‍යාගයක් එවා ඇති බවට පැවසීම වැනි විවිධ උපක්‍රම යොදා ගනිමින් ජනතාව රැවටීමේ සිදුවීම් වාර්තා වී ඇති බව සඳහන්.
එමෙන්ම රේගුවේ රැකියා ලබාදෙන බව පවසා මුදල් වංචා කළ සිදුවීම් ද වාර්තා වී තිබෙනවා.
මෙවැනි ඇමතුම්වලට රැවටී නාඳුනන පුද්ගලයන්ගේ ගිණුම්වලට මුදල් තැන්පත් කිරීමට කටයුතු නොකරන ලෙසටයි ශ්‍රී ලංකා රේගුව ජනතාවට දැනුම් දෙන්නේ.
මෙවැනි වංචනික ක්‍රියා සිදුකරන පුද්ගලයන් පිළිබඳ කඩිනමින් තම ආයතනය දැනුවත් කිරීමට කටයුතු කරන ලෙස රේගු මාධ්‍ය ප්‍රකාශක අතිරේක රේගු අධ්‍යක්ෂ ජනරාල් සුදත්ත සිල්වා මහතා ඉල්ලීමක් කරනවා.
