ඩොලරයට සාපේක්ෂව රුපියලේ අගය පහත වැටීමට ආණ්ඩුවේ ප්‍රතිපත්තියක් හෝ වැරදි තීරණයක් මත සිදු නොවූවක් බව මුදල් නියෝජ්‍ය අමාත්‍ය අනිල් ජයන්ත පවසනවා.
මැදපෙරදිග මතුව තිබෙනවා යුදමය තත්ත්ව හේතුවෙන් හටගත් ගෝලීය අර්බුදයක ප්‍රතිඵලයක් මත ශ්‍රී ලංකා රුපියල පහත වැටීමට හේතු වූ බවයි මුදල් නියෝජ්‍ය අමාත්‍යවරයා සඳහන් කළේ.
අද (22) දහවල් රජයේ ප්‍රවෘත්ති දෙපාර්තමේන්තුවේ පැවැති විශේෂ ප්‍රවෘත්ති සාකච්ඡාවකට එක්වෙමින් ඔහු මේ බව සඳහන් කර සිටියා.
ආනයනය නවතා දමා, ආනයනය තහනම් කර ආර්ථිකය හකුළුවා දැමීමට රජය කිසිදු තීරණයක් ගෙන නොමැති බවයි නියෝජ්‍ය අමාත්‍යවරයා මෙහිදී වැඩිදුරටත් සඳහන් කර සිටියේ.
මේ අතර පසුගිය කාලය තුළ ආනයනය කරන භාණ්ඩවල ඩොලර් මිල මෙන්ම අපනයනය කරන භාණ්ඩවලට ඩොලර් මිල වෙනස් වූ බවයි ඔහු මෙහිදී සඳහන් කළේ.
අපනයන කරන භාණ්ඩවල ඩොලර් මිලට වඩා ආනයනය කරන භාණ්ඩවල ඩොලර් මිල ගණන් ඉහළ යාමද මෙරටට ප්‍රධාන වශයෙන් බලපෑ බවද මෙම ප්‍රවෘත්ති සාකච්ඡාවේ දී පැවසුවා.
එමෙන්ම ගෝලිය වශයෙන් ඩොලරය ස්ථාවර කර ගැනීම සඳහා මෙන්ම ඩොලරයට වැඩි ප්‍රතිලාභයක් ලබාදීමට ගෙන ඇති ක්‍රියාමාර්ග නිසා ඩොලර් සඳහා ඉල්ලුම වැඩි වී ඩොලරයට ආයෝජන විතැන්මේ ප්‍රවණතාවයක් දක්නට ලැබුණු බවත්, මේ හේතුවෙන් අනෙකුත් මුදල් ඒකකයන්ට සාපේක්ෂව ඩොලරය ශක්තිමත් වී ඇති බව ද ඔහු වැඩිදුරටත් සඳහන් කර සිටියා.
