දිල්ලි කැපිටල්ස් කණ්ඩායමේ නායක රිෂාබ් පාන්ට්ට එක් තරගයක තහනමක් සහ ඉන්දීය රුපියල් ලක්ෂ 30ක දඩ මුදලක් නියම කිරීමට ඉන්දීය ක්‍රිකට් පාලක මණ්ඩලය තීරණය කර තිබෙනවා.
ඉන්දීය ක්‍රිකට් පාලක මණ්ඩලය අද (11) නිකුත් කර ඇති නිවේදනයට අනුව රාජස්ථාන් රෝයල්ස් කණ්ඩායමට සමඟ පසුගිය 07 වනදා පැවති තරගයේ දී චර්යාධර්ම සංග්‍රහය උල්ලංඝනය කිරීම සම්බන්ධයෙන් ඔහුට එරෙහිව මෙම දඬුවම් පැනවීමට තීරණය කර ඇති බවයි වාර්තා වන්නේ.
එම තරගයේ දී දිල්ලි කණ්ඩායම මන්දගාමී ඕවර් රේට් එකක් පවත්වාගෙන යාමෙන් අයිපීඑල් චර්යාධර්ම සංග්‍රහය කඩ වී ඇති බවයි අදාළ නිවේදනය මඟින් පෙන්වා දී ඇත්තේ.
මීට අමතරව එම තරගයට ක්‍රීඩා කළ දිල්ලි කණ්ඩායමේ අනෙකුත් ක්‍රීඩකයින්ට ද දඩ නියම කිරීමට කටයුතු කර තිබෙනවා.
රිෂාබ් පාන්ට්ට පැනවූ මෙම දඬුවමත් සමඟ හෙට (12) දිනයේ රෝයල් චැලෙන්ජස් බැංගලූරු කණ්ඩායම සමඟ පවැත්වෙන තරගය ඔහුට අහිමිව යනවා.
අයි.පී.එල්. හි සෑම කණ්ඩායමකටම ඔවුන්ගේ ඉනිමේ පන්දුවාර 20 සම්පූර්ණ කිරීමට මිනිත්තු 85ක් (ඕවරයකට මිනිත්තු 4.25ක්) ලබා දී තිබෙනවා.
කෙසේ වෙතත් රාජස්ථාන් රෝයල්ස් කණ්ඩායම් සමඟ පැවති තරගයේ දී දිල්ලි කණ්ඩායම ඔවුන්ගේ පන්දුවාර 20 සම්පූර්ණ කිරීමට මිනිත්තු 117.82ක් ගතකර ඇති බවයි වාර්තා වන්නේ.
