මෙරට තුළ සිදු වන රිය අනතුරුවලින් දිනකට වටිනා ජීවිත 07ක් අහිමි වන බව වයඹ පළාත භාර ජ්‍යේෂ්ඨ නියෝජ්‍ය පොලිස්පති නීතිඥ අජිත් රෝහණ මහතා පවසනවා.
ලේඛක පියසෝම රොද්‍රිගෝ මහතා විසින් රචනා කරන ලද ”කොළ මාලන් හාස්‍යෝත්පාදක කෙටිකතා සංග්‍රහය සහ කඩදාසි ඔරු කාව්‍ය සංග්‍රහය” දොරට වැඩීමේ උත්සවයට එක් වෙමින් ජ්‍යේෂ්ඨ නියෝජ්‍ය පොලිස්පතිවරයා මේ බව සඳහන් කළා.
රිය අනතුරු යනු ත්‍රස්තවාදයක් බවත්, දිනකට සිදුවන අනතුරුවලින් පුද්ගලයි 20 දෙනෙකු පමණ සදාකාලික ආබාධිත තත්ත්වන බවත් අජිත් රෝහණ මහතා පැවසුවා.
කෙතරම් නීතිරීති තිබුණ ද, රියදුරන් එය නොතකන බවත්, ලෝකයේ අවිනීතම රියදුරන් සිටින්නේ දකුණු ආසියාතික රටවල බවත් ඒ මහතා වැඩිදුරටත් අවධාරණය කළා.
මාර්ග ආලෝක සංඥා පුවරු ආසන්නයේ දී දඟර ගැසුණු ආකාරයෙන් යතුරුපැදි හා ත්‍රීරෝද රථ අනෙකාව පසුකරමින් කඩිනමින් ගමන් කිරීමට දරන උත්සාහයන් ද මාර්ග නීතිරීති උල්ලංඝනය කිරීමක් ලෙස සැලකිය හැකි බවත් එවනි ක්‍රියා හේතුවෙන් රට තුළ අවිනීතවත් රියදුරන් බිහි ව ඇති බවත් ජ්‍යෙෂ්ඨ නියෝජ්‍ය පොලිස්පතිවරයාගේ අදහසයි.
