පොල්ගහවෙල පොලීසියට අනුයුක්තව රාජකාරියේ නිරතව සිටිය දී රිය අනතුරකට ලක්ව ජීවිතක්ෂයට පත්වූ පොලිස් නිලධාරියාට උසස්වීමක් පිරිනමා තිබෙනවා.
ඒ අනුව එම නිලධාරියා පොලිස් කොස්තාපල් තනතුරේ සිට පොලිස් සැරයන් තනතුර දක්වා උසස් කර ඇති බවයි පොලිස් මාධ්‍ය කොට්ඨාසය සඳහන් කළේ.
පශ්චාත් උසස්වීම් පදනම යටතේ ඔක්තෝම්බර් 10 වන දින සිට පොලිස්පතිවරයා විසින් මෙම උසස්වීම පිරිනමා ඇති බවයි වාර්තා වුණේ.
පොල්ගහවෙල පොලීසියට අනුයුක්තව පොලිස් කොස්තාපල්වරයෙකු ලෙස රාජකාරියේ නිරතව සිටිය දී නන්දන සුමිත් කුමාර ඉලංගරත්න නිලධාරියා පසුගිය ඔක්තෝම්බර් 09 වන දින රිය අනතුරකට ලක්ව ජීවිතක්ෂයට පත් වුණා.
කොළඹ – කුරුණෑගල ප්‍රධාන මාර්ගයේ පුහුරිය ප්‍රදේශයේ දී මෙම අනතුර සිදුවූ අතර, කන්තලේ සිට කඩුවෙල ප්‍රදේශයට වැලි ප්‍රවාහනය කළ ටිපර් රථයක් මාර්ගය අසළ රාජකාරී කරමින් සිටි මෙම පොලිස් නිලධාරියාගේ ගැටී තිබුණා.
එම අවස්ථාවේ දී පොලිස් නිලධාරියා විසි වී ගොස් ඉදිරියෙන් නවතා තිබූ පොලිස් කැබ් රථයේ ගැටීමෙන් මෙම අනතුර සිදුව ඇති බවයි පොලිසිය පැවසුවේ.
අනතුරෙන් බරපතළ තුවාල ලැබූ පොලිස් නිලධාරියා පොල්ගහවෙල රෝහලට ඇතුළත් කිරීමෙන් පසු වැඩිදුර ප්‍රතිකාර සඳහා කුරුණෑගල රෝහලට ඇතුළත් කිරීමේ දී මිය ගියා.
