රිමාන්ඩ් කරපු දොස්තර ඉල්ලා කරාපිටියේ පිළිකා අංශය විරෝධතාවක

ගාල්ල – කරාපිටිය රෝහලේ පිළිකා අංශයේ වෛද්‍යවරුන්, හෙදියන් සහ රෝගීන් එක්ව අද (19) උදෑසන එම රෝහල ඉදිරිපිට විරෝධතාවක නිරතව තිබෙනවා.

එම රෝහලේ පිළිකා අංශයේ පිළිකා අංශයේ ප්‍රධානී විශේෂඥ වෛද්‍ය ක්‍රිෂාන්ත පෙරේරා අත්අඩංගුවට ගෙන රිමාන්ඩ් බන්ධාගාර ගත කිරීමට විරෝධය දක්වමින් මෙම විරෝධතාවය පවත්වා ඇති බවයි වාර්තා වුණේ.

ඔවුන් එහිදී කියා සිටියේ වෛද්‍යවරයාට ද බලපෑම් සිදුකළ පුද්ගලයින්ට ද එරෙහිව වහාම නීතිය ක්‍රියාත්මක කරන ලෙසයි.

කරාපිටිය ශික්ෂණ රෝහලේ කනිෂ්ඨ කාර්යමණ්ඩල සේවිකාවකට පහරදුන් බවට චෝදනා එල්ල වූ රෝහලේ පිළිකා අංශ ප්‍රධානී විශේෂඥ වෛද්‍යවරයා මෙම මස 21 වනදා දක්වා රක්ෂිත බන්ධනාගාරගත කළා.

ඒ, සැකකාර වෛද්‍යවරයා ඊයේ (18) ගාල්ල මහේස්ත්‍රාත්වරයා හමුවට ඉදිරිපත් කිරීමෙන් අනතුරුවයි.

සෞඛ්‍ය වෘත්තීය සමිති කිහිපයක් විසින් සිදුකළ ඒකාබද්ද වර්ජනය අවසන් වී පසුව පෙරේදා (17) පෙරවරුවේ කරාපිටිය ශික්ෂණ රෝහලේ සෞඛ්‍ය සේවකයන් යළි සේවයට වාර්තාකර තිබුණි.

එහිදී වර්ජනයෙන් රෝහලේ කටයුතුවලට බාධා එල්ල වූ බවට චෝදනා කරමින් එම රෝහලේ පිළිකා අංශ ප්‍රධානී ලෙස කටයුතු කරන විශේෂඥ වෛද්‍යවරයා එහි කනිෂ්ඨ කාර්යමණ්ඩලයට බැණවැදී ඇති බවයි වාර්තා වුණේ.

එම අවස්ථාවේ දී අදාළ විශේෂඥ වෛද්‍යවරයා රෝහල් කනිෂ්ඨ කාර්යමණ්ඩල සේවිකාවකට පරුෂ වචනයෙන් බැණවැදී පහරදීමක් සිදුකළ බවට චෝදනා එල්ල වූ අතර, පහරකෑ බව කියන සුුළු සේවිකාව ප්‍රතිකාර සඳහා එම රෝහලටම ඇතුළත් වී තිබුණා.

සිද්ධියට සම්බන්ධ විශේෂඥ වෛද්‍යවරයා අත්අඩංගුවට ගන්නා ලෙස බලකරමින් රෝහල් කනිෂ්ඨ කාර්යමණ්ඩල වැඩ වර්ජනයක් ආරම්භ කළ අතර, විරෝධතාවක ද නිරත වුණා.

මේ අතර සිද්ධියට සම්බන්ධ බව කියන සැකකාර විශේෂඥ වෛද්‍යවරයා ගාල්ලේ පෞද්ගලික රෝහලක ප්‍රතිකාර ලබමින් සිටියදී පොලීසිය මඟින් අත්අඩංගුවට ගෙන මහේස්ත්‍රාත්වරයා හමුවට ඉදිරිපත් කරනු ලැබුවා.